Tags-Subah

tulū-e-sub.h kī afvāh par mahfil se us kī
hazāroñ anjum-o-mahtāb ruḳhsat ho ga.e haiñ

sub.h hotī hai to kunj-e-ḳhush-gumānī meñ kahīñ
pheñk dī jaatī hai shab bhar kī siyāhī bāñdh kar

ḳhūn-e-nāhaq hai ye are tauba
sub.h ġhunchoñ kā shaam phūloñ kā

allāh rī vāmāñdagī-e-qāfila-e-shām
baiThe rahe tā-sub.h sar-e-rāh-guzar ham

sub.h-dam mujh se lipaT kar vo nashe meñ bole
tum bane bād-e-sabā ham gul-e-nasrīn hue

sub.h huī to āftāb saarī bisāt ulaT gayā
raat usī maqām par raunaq-e-bazm thā charāġh

jalā diyā jo patañg ab na ro huā so huā
ai sham.a sub.h ko jo ho so ho huā so huā

tirā paañv shaam pe aa gayā thā ki chāñd thā
tirā hijr sub.h ko jal uThā thā ki phuul thā

kal bhī ruḳh-e-hayāt par rañg-e-shaguftagī na thā
sub.h-e-bahār-e-zindagī shām-e-ḳhizāñ hai aaj bhī

har sub.h chaak ho hai nāseh mirā garebāñ
har shaam tū rakhe hai nāhaq silā silā kar

sad-chāk dil kā honā har sub.h-dam hamārā
gul se tū kah rahī hai bulbul hañsā hañsā kar

bahut qarīne kī zindagī thī ajab qayāmat meñ aa basā huuñ
sukūn kī sub.h chāhtā thā so shām-e-vahshat meñ aa basā huuñ

hastī ke bhayānak nazzāre saath apne chale haiñ duniyā se
ye ḳhvāb-e-pareshāñ aur ham ko tā-sub.h-e-qayāmat sonā hai

hamāre ghar ke āñgan meñ sitāre bujh ga.e lākhoñ
hamārī ḳhvāb gāhoñ meñ na chamkā sub.h kā sūraj

ye añdherā jo ayaañ sub.h kī tanvīr meñ hai
kuchh kamī ḳhūn-e-jigar kī abhī tasvīr meñ hai

sub.h kā nayā sūraj kuchh to raushnī legā
shaam se jalāyā hai aas kā diyā ham ne

raat kī raat Thaharne vaale vaqt-e-ḳhush kī baat samajh
sub.h to ik darvāza-e-ġham par duniyā āñkheñ maltī hai

yahī atiyya-e-sub.h-e-shab-e-visāl hai kyā
ki sehr-e-nāz-o-zadā bhī nahīñ rahā ab to

sub.h utrā thā maiñ jañgal meñ
to sochā thā ki us shoḳh hiran ko

sub.h se shaam huī aur hiran mujh ko chhalāve detā
saare jañgal meñ pareshān kiye ghuum rahā hai ab tak