Tags-Tajraba

hai baat us kī achchhī lagtī hai dil ko sachchī phir bhī hai thoḌī kachchī
jo us kā hādisa hai merā bhī tajraba ho ye baat to ġhalat hai

dostī se tajraba ye ho gayā
dushmanoñ se pyaar karnā chāhiye

mujhe azīzān-e-man mohabbat kā koī bhī tajraba nahīñ hai
maiñ is safar meñ nayā nayā huuñ mujhe duāoñ meñ yaad rakhnā

maqsad to tajraba hai davā kā shifā nahīñ
kuchh bhī marīz par ho asar sab durust hai

dasht meñ shahr yaad aatā hai
ishq kā pahlā tajraba hai mujhe

tajraba kar liyā aur dekh liyā sab ko 'sharaf'
koī hamdard nahīñ yād-e-ḳhudā se baḌh kar

mujhe udaas na kar varna saakh TūTegī
nahīñ hai tajraba mujh ko malāl karne kā

kuchh na kuchh pahle khonā paḌtā hai
muft meñ tajraba nahīñ hotā

lahū kā zā.iqa na chakh lahū kā tajraba na kar
lahū hai iztirāb iztirāb ke liye nahīñ

dard-e-dil pāoge vafā kar ke
ham ne dekhā hai tajraba kar ke

jo kitāboñ meñ hai vo sab kā hai
tū batā terā tajraba kyā hai

tajraba ye hai ki har zulf-e-ḳhirad
dast-e-vahshat hī ne suljhā.ī hai

aaj pahle-pahal tajraba ye huā iid hotī hai aisī ḳhabar hī na thī
chāñd ko dekhne ghar se jab maiñ chalī dūsrā chāñd mere qarīb aa gayā

jo maiñ bhī aag meñ hijrat kā tajraba kartā
muhājiroñ hī meñ hotā vahāñ shumār mirā

mehnat shu.ūr tajraba ta.alīm-o-tarbiyat
sab kuchh hai be-asar ki zamāna ḳharāb hai

kyā samjhe the aur tū kyā niklā ye soch ke hī hairān haiñ ham
hai pahle-pahal kā tajraba aur kam-umr haiñ ham anjān haiñ ham

mujhe zindagī kā koī tajraba nahīñ
shāyad apnī ġhaltiyoñ ko hañs kar bhūlne ke fuqdān ko tajraba kahte haiñ

na hote dil se jo majbūr kar ke tark-e-vafā
use bhī ham zarā taḌpā ke tajraba karte

zindagī ke is safar meñ tajraba ham ko huā
saath sab haiñ par kabhī pahchāntā koī nahīñ

sun rakhā thā tajraba lekin ye pahlā thā mirā
jab kisī ke naam par be-vaj.h dil dhaḌkā mirā