Tags-Tajraba

va.ada-e-ulfat-o-paimān-e-vafā se tauba
tajraba kahtā hai us husn-e-adā se tauba

harf-e-duā o dast-e-saḳhāvat ke baab meñ
ḳhud merā tajraba hai vo be-had najīb thā

use chhūte hue bhī Dar rahā thā
vo merā pahlā pahlā tajraba thā

ab samajh lete haiñ mīThe lafz kī kaḌvāhaTeñ
ho gayā hai zindagī kā tajraba thoḌā bahut

ab zarā sā fāslā rakh kar jalātā huuñ charāġh
tajraba ye haath aayā haath jal jaane ke ba.ad

is mashaqqat ne use tajraba in.aam diyā
ik thakan us ko magar dasht-e-safar ne dī hai

kāñToñ se jism chhalnī hai merā isī liye
phūloñ se pyaar karne kā kuchh tajraba na thā

hijr aur dasht meñ jo shaḳhs bhī Thahrā 'ashfāq'
tajraba uḌtī huī ḳhaak meñ dekhā gayā hai

dam bhar meñ dho.e jā.eñge sab dāġh-e-ma.asiyat
yak qatra ashk tajraba-sāmāñ nikāliye

nikal ke zindagī jaisī kaḌī haqīqat se
mujhe to talḳh sā ik tajraba bhī karnā thā

bas ek tajraba mere liye bahut hai dilā
ik aur ishq meñ phir mubtalā na ho jā.ūñ

sitam bhī uThā.e hazāroñ tarah ke balā.eñ bhī jhelīñ hazāroñ tarah kī
huā tajraba ham ko ye dil lagā kar hasīnoñ se dil kā lagānā hai jhanjhaT

zindagī kyā hai abhī tajraba karnā hai 'nushūr'
shā.irī kyā hai abhī naqd o nazar baaqī hai

zindagī ne na kisī imtihāñ ko dohrāyā
tajraba kaam hī aayā nahīñ apnā saarā

safar meñ ab ke ajab tajraba nikal aayā
bhaTak gayā to nayā rāsta nikal aayā

ye tajraba huā hai mohabbat kī raah meñ
kho kar milā jo ham ko vo pā kar nahīñ milā

ye tajraba bhī karūñ ye bhī ġham uThā.ūñ maiñ
ki ḳhud ko yaad rakhūñ us ko bhuul jā.ūñ maiñ

jabhī to umr se apnī ziyāda lagtā huuñ
baḌā hai mujh se ka.ī saal tajraba merā

zarūrī chiiz hai ik tajraba bhī zindagānī meñ
tujhe ye degrēyāñ būḌhoñ kā ham-sin kar nahīñ saktīñ

agarche is se guzar to rahā huuñ maiñ 'āsim'
ye tajraba bhī mirā apnā tajraba hai kahāñ