Tags-Tamanna

thā dil bhī kabhī shahr-e-tamannā se mumāsil
ye qarya hamesha se bayābāñ to nahīñ thā

ajab ki arz-e-tamannā ke pech-o-ḳham na khule
'shahāb' husn-e-talab ko hazār saada kiyā

dil-e-betāb kī tamannā hai
phir kahūñ maiñ sunā kare koī

tez havā kī dhaar se kaT kar kyā jaane kab gir jaa.e
lahrātī hai shāḳh-e-tamannā kachchī bel chamelī sī

manzil kī tamannā hai to Thukrā ke nikal jā
sayyād liye dāna-o-dām aate raheñge

ajiib dasht-e-tamannā se thā guzar 'ḳhālid'
badan meñ reg-e-ravāñ thī safar meñ paanī thā

maiñ kyā karūñ ki zabt-e-tamannā ke bāvajūd
be-iḳhtiyār lab pe tirā naam aa gayā

har ek shaḳhs tark-e-tamannā kā mudda.ī
har ek shaḳhs terī tamannā liye hue

pukārtā huuñ ki tum hāsil-e-tamannā ho
agarche merī sadā bhī sadā-ba-sahrā ho

jab nazar aatā hai vo jān-e-tamannā dil meñ
kis tamannā ko liye tuur pe jaa.e koī

haiñ fasīloñ se uljhe hue sar-phire
duur tak koī shahr-e-tamannā nahīñ

shorish-e-ishq meñ hai husn barābar kā sharīk
soch kar jurm-e-tamannā kī sazā do ham ko

shā.irī meñ jo hai rutbe kī tamannā 'rūmī'
fikr kī tah meñ utar jaao ġhazal hone tak

ajiib chiiz hai ye arsa-e-tamannā bhī
jise bhī dekhiye qaidī isī hisār kā hai

zindagī aa tujhe qātil ke havāle kar duuñ
mujh se ab ḳhūn-e-tamannā nahīñ dekhā jaatā

dekh kar qasr-e-tamannā kī tabāhī shāyad
gulshan-e-dil ke dar-o-bām se Dar lagtā hai

har samt uḌī gard mire shahr-e-gumāñ meñ
mahsūr tamannā hai zamāne ke dhuāñ meñ

kaT ga.ī shāḳh-e-tamannā 'amabar'
nā-umīdī kā shajar baaqī hai

vo ye kahte haiñ zamāne kī tamannā maiñ huuñ
kyā koī aur bhī aisā hai ki jaisā maiñ huuñ

hamārī baat par vo kaan dhartā hī nahīñ hai Taal jaatā hai
tumheñ kyā kyā nahīñ hāsil kaho arz-e-tamannā kaise karte ho