Tags-Tamanna

mirā ḳhvāb-e-tamannā sā.at-e-bedār jaisā hai
magar ik ik nafas chaltī huī talvār jaisā hai

aur ishrat kī tamannā kyā kareñ
sāmne tū ho tujhe dekhā kareñ

ik raushnī sī dil meñ thī vo bhī nahīñ rahī
vo kyā ga.e charāġh-e-tamannā bujhā ga.e

jiine vāloñ se kaho koī tamannā DhūñDeñ
ham to āsūda-e-manzil haiñ hamārā kyā hai

tabī.atoñ meñ baḌā iḳhtilāf hotā hai
mujhe to arz-e-tamannā pe sharm sī aa.ī

vo mere ḳhvāboñ ko āñkhoñ se chhīn letā hai
use na shahr-e-tamannā kī hukmarānī de

pursish-e-ġham to huī thī lekin
ham se iz.hār-e-tamannā na huā

un kī qurbat hī sahī hāsil-e-zīst
ye to andāz-e-tamannā na huā

eid kā chāñd jo dekhā to tamannā lipTī
un se taqrīb-e-mulāqāt kā rishta niklā

aur duniyā meñ kahīñ terā Thikāna hī nahīñ
ai mire dil kī tamannā lab-e-ḳhāmosh meñ aa

tamannā jhāñktī hai rauzan-e-zindāñ se chhup chhup kar
asīrī meñ magar anjām-e-shab kuchh bhī nahīñ hotā

har shāḳh-e-tamannā par merī har-chand ki barg-o-bār lage
vo peḌ jo mere naam kā hai, har aañkh ko sāya-dār lage

chaman-zār-e-tamannā kā faqat ik phuul murjhāyā
usī din se mire gulshan kī vīrānī nahīñ jaatī

so ab tū bazm-e-tamannā meñ tā.irāna chahak!
tire dimāġh pe halkā sā bojh thā na mirā?

havā kuchh aisī chalī hai 'faizī' tamīz apnoñ kī ab hai mushkil
mirī tamannā bhī kuchh ḳhafā hai vafā bhī dāman chhuḌā rahī hai

ik mauj bhī rakhtī hai kināre kī tamannā
āvāra jo phirtā huuñ ye merā hī jigar hai

ik tirī diid kī tamannā hai
aur rakkhā hai is jahān meñ kyā

sīñchā thā jis ko ḳhūn-e-tamannā se rāt-din
gulshan meñ us bahār ke haqdār ham nahīñ

bahī-ḳhvān-e-karam se hai sadā ummīd 'chandā' ko
kisī kī bhī na ho muhtāj tum se ye tamannā hai

nargis kī shab-e-tīra meñ lūTeñge bahāreñ
par surmagīñ āñkhoñ kī tamannā na kareñge