Tags-Tamanna

mujhe dars-e-sukūñ dete haiñ vo josh-e-tamannā meñ
udhar tūfāñ kī ḳhvāhish hai idhar sāhil kī bāteñ haiñ

tum hamāre dil-e-shaidā ko nahīñ jānte kyā
aur ġhairoñ kī tamannā ko nahīñ jānte kyā

ab yahī shakl-e-tamannā hai ki ham
umr bhar ḳhvāb-e-tamannā dekheñ

dāman-e-husn meñ har ashk-e-tamannā rakh do
diin kī raah meñ hañgāma-e-duniyā rakh do

roz-e-raushan kī tarah hoñgī munavvar rāteñ
chand sho.ale jo sar-e-bazm-e-tamannā rakh do

hue ho jāñ-ba-lab ab hogā kyā tamannā kā
jahāñ pe DhūñDte ho dil agar vahāñ na huā

dil meñ kuchh karne kī tamannā rakh
zindagī varna maut sī hogī

kaisā tazād shāḳh-e-tamannā meñ hai 'asad'
ḳhud ye harī harī hai samar zard zard hai

koī añgḌā.iyāñ letā jab aa jaatā hai mahfil meñ
tamannā karvaTeñ letī hai paiham dukh-bhare dil meñ

jab dil hī nahīñ hai pahlū meñ phir ishq kā saudā kaun kare
ab un se mohabbat kaun kare ab un kī tamannā kaun kare

aalam pe hai chhāyā huā ik yaas kā aalam
yaanī ki tamannā ke giraftār bahut haiñ

ham-nashīñ sāda-dilī-hā-e-tamannā mat pūchh
be-vafāoñ se vafāoñ kā sila māñgte haiñ

qubūl o rad ke sabhī iḳhtiyār us ke the
magar maiñ ḳhush thā tamannā ko us pe vaar ke bhī

hai unheñ to vaqār-e-ijz-o-niyāz
vo tamannā jo bar nahīñ aatī

aaj pindār-e-tamannā kā fusūñ TuuT gayā
chand kam-zarf gile nok-e-zabāñ tak pahuñche

tum se ulfat ke taqāze na nibāhe jaate
varna ham ko bhī tamannā thī ki chāhe jaate

mire hī zaḳhm-e-tamannā meñ sau tarah ke rañg
bharī bahār meñ mahrūm-e-rañg-o-bū bhī maiñ

mujhī se qā.em-o-dā.em haiñ ghar ke sannāTe
tumhārī bazm-e-tamannā kī hāv-hū bhī maiñ

yuuñ vaqt guzartā hai
fursat kī tamannā meñ

yuuñ apnī tamannā muztar hai yuuñ apnī mohabbat vīrāñ hai
kāñTe se bichhe haiñ har jānib palkoñ se uThānā paḌtā hai