Tags-Tamanna

tamannā meñ bose kī kahtā hai jī
badan se nikal bhī agar jā.eñge

ab kahāñ lazzat-e-ehsās-e-taraqqī 'mānī'
yaas meñ jazar-o-mad-e-dard-e-tamanna bhī nahīñ

hijr kā ġham bhī nahīñ vasl kī parvā bhī nahīñ
dil bhī pahlū meñ nahīñ dil kī tamannā bhī nahīñ

be-niyāzī-e-tamanna ki hai ik jannat-e-ishq
dil ne paayā nahīñ fitrat se ye in.aam abhī

yārab mujhe hai dāġh-e-tamannā bahut aziiz
pahlū se dil judā ho magar ye judā na ho

kitnī pyārī hai vo ma.asūm tamannā ai dost
jo tazabzub kī fazāoñ meñ javāñ hotī hai

hai tamannā ki chamakte raheñ mehvar ke baġhair
havas-e-ḳhām na de ishq tū lā-fānī de

jaane kyā kyā nazar aatā hai tamannā bar-kaf
mere mālik mujhe do roz kī sultānī de

sar-e-rāh tamannā ḳhaak Dālūñgā maiñ sar meñ
jo aañsū bujh ga.e un kī azā-dārī karūñgā

kiyā arz-e-tamannā maiñ ne jab vo hañs ke ye bole
nahīñ karte kisī se ishq kā iz.hār chuTkī meñ

ḳhizāñ-dīda thā us se pahle merā gulshan-e-hastī
mirā bāġh-e-tamannā ho gayā gulzār chuTkī meñ

har tamannā dil se ruḳhsat ho ga.ī
aaj mustahkam mohabbat ho ga.ī

hai mahv-e-tamannā dil-e-āzurda ki dekhe
pindār-e-mohabbat meñ hai andāz-e-ḳhudā kyā

dekh to liije mire ḳhūn-e-tamannā kī bahār
jis kī surḳhī mirī ā.ankhoñ meñ utar aa.ī hai

raat bhar terī tamannā ke safar meñ guzrī
duur tak tīrgī-e-rāh pukārī pāgal

jo dost the unheñ dushman banā ke dekh liyā
zabāñ pe dil kī tamannā ko lā ke dekh liyā

jo lazzat-e-āshnā-e-dard-e-hijrāñ hote jaate haiñ
sar-e-kū-e-tamannā vo ġhazal-ḳhvāñ hote jaate haiñ

log kahte haiñ use qasr-e-tamannā apnā
jis ke aslāf the apne kabhī me.amāroñ meñ

chalte haiñ dene ko ham jise dil vo hañs ke le le bas ab hameñ to
yahī hai ḳhvāhish yahī tamannā yahī hai maqsad yahī hai matlab

jal uThī sham-e-tamannā sar-e-mehrāb-e-visāl
kaun aatā hai ye ḳhurshīd-e-farozāñ kī tarah