Tags-Tamanna

dil jise kahte haiñ pahlū meñ kabhī vo hogā
ham ne to dil kī jagah dāġh-e-tamannā dekhā

is tamannā par huā huuñ ḳhaak maiñ o jañg-jū
merī miTTī ke tujhe meñDhe laḌānā chāhiye

maiñ udāsī sar-e-bāzār bhī lā.ūñ aise
jaise paanī kī tamannā meñ ho kashtī ruḳhsat

dil meñ chhap kar bhī ḳhushbueñ degī
har tamannā gulāb hai pyāre

aur ma.ashūq se milne kī tamannā kyuuñ ho
aap kyā kam haiñ mirī jaan ke dushman mujh ko

vo rañg-e-tamannā hai ki sad-rañg huā huuñ
dekho to nazar huuñ jo na dekho to sadā huuñ

ye rihā.ī kī tamannā kyā hai
jab mire paañv meñ zanjīr nahīñ

bas yahī ik tamannā hai 'indar'
kaash mil jaa.eñ ham december meñ

tamannā baḌh na jaa.e had se zaa.ed
hameñ shāh-e-najaf ab yaad kiije

māyūs-e-azal huuñ ye maanā nākām-e-tamannā rahnā hai
jaate ho kahāñ ruḳh pher ke tum mujh ko to abhī kuchh kahnā hai

musībat ho ga.ī āḳhir tamannā kī giraftārī
agar be-mudda.ā hotā to banda bhī ḳhudā hotā

kab satvat-e-asbāb kī hai dil ko tamannā
ham ahl-e-tarīqat ko to pindār bahut hai

chāhat kī tamannā se koī aañch na aa.ī
ye aag mire dil meñ baḌe Dhab se lagī hai

ye vo matā-e-girāñ hai jo mil nahīñ saktī
sukūn-e-dil kī tamannā na kar zamāne meñ

kuchh to batāo ai farzāno dīvānoñ par kyā guzrī
shahr-e-tamannā kī galiyoñ meñ barpā hai kohrām bahut

hazār chashm-e-tamannā banegī dast-e-savāl
nikal ke ḳhalvat-e-ġham se nazar uThāo to

terā ḳhayāl terī tamannā tak aa gayā
maiñ dil ko DhūñDhtā huā duniyā tak aa gayā

tire sivā kise DhūñDūñ sarāb-o-sahrā meñ
tirī hī zaat kā partav har ik tamannā meñ

bujh na jaa.eñ kahīñ dil ahl-e-tamannā ke 'ziyā'
kaise sho.aloñ se hai ye jashn-e-tarab-nāk na kah

vo aa bhī jaate vo ho bhī jaate
chashm-e-tamannā phir bhī tarastī