Tags-Tanhai

pahle pahle kuchh hirāsāñ se the ham tanhā.ī se
chāñd taare aa ga.e phir ḳhāmushī achchhī lagī

sitāra thā koī jis se munavvar thī ye tanhā.ī
nazar meñ zau-fishāñ ye āsmāñ saarā na thā pahle

tum se mil kar der talak
achchhī lagtī tanhā.ī

aisī tanhā.ī ki ghar dasht lage
aisā sannāTā agar patta hile

ā.inoñ meñ aks bin kar jin ke paikar aa ga.e
halqa-e-tanhā.ī se vo log bāhar aa ga.e

kyā terā mudāvā ho dard-e-shab-e-tanhā.ī
chup rahiye to barbādī kahiye to gilā hogā

naam hī rah gayā ik anjuman-ārā.ī kā
chhup gayā chāñd bhī ab to shab-e-tanhā.ī kā

dil aaj shaam se hī use DhūñDne lagā
kal jis ke ba.ad kamre meñ tanhā.ī aa.ī thī

kahīñ aisā na ho ki tanhā yūñhī rahte rahte
rafta rafta mujhe tanhā.ī kī aadat ho jaa.e

ruḳh pe jo tere shafaq khilī hai ḳhuun hai mere ḳhvāboñ kā
kahe tū ai shām-e-tanhā.ī tujh se lipaT kar ro luuñ maiñ

be-libāsī hī na ban jaa.e kahīñ terā libās
ā.īne ke sāmne pāgal na ho tanhā.ī meñ

vo musalsal chup hai tere sāmne tanhā.ī meñ
sochtā kyā hai utar jā baat kī gahrā.ī meñ

phir vahī tīra-baḳhtiyāñ apnī
phir shab-e-ġham hai aur tanhā.ī

apne chāñd kī sochoñ meñ gum baiThā thā tanhā.ī meñ
jaane mere dil ke suune āñgan meñ kab niklā chāñd

tum se ābād hai ye tanhā.ī
tum hī raushan ho ghar ke jāloñ meñ

arsa-e-har-do-jahāñ ālam-e-tanhā.ī hai
ki jidhar dekhiye tū hai tirī yaktā.ī hai

sāhil-e-marg pe rafta rafta le aayā
tanhā.ī kā rog bhī achchhā dushman hai

merī tanhā.ī meñ ik vajd kī kaifiyyat hai
raqs kartā huuñ maiñ ik ālam-e-asrār ke saath

tū hai aur aish hai aur anjuman-ārā.ī hai
maiñ huuñ aur ranj hai aur gosha-e-tanhā.ī hai

merī āñkhoñ meñ har ik rañg thā tanhā.ī kā
ik ḳhalā bhī mirī tasvīr meñ rakkhā gayā thā