Tags-Tanhai

tū mere hamrāh to aayā thā lekin
tanhā.ī ke kāñTe bone aayā thā

isī raat aur din ke mele meñ tirā haath chhuTe mire hāthoñ se
tire saath tirī tanhā.ī ho mire saath mirī vīrānī ho

tanhā.ī chalī aa.e khulā jaan ke ik dar
palkoñ se agar yaad ke darbāñ ko nikālo

tujh se mil kar bhī na tanhā.ī miTegī merī
dil meñ rah rah ke yahī baat khaTaktī kyuuñ hai

guftugū hotī hai aksar shab-e-tanhā.ī meñ
ek ḳhāmosh takallum tirī tasvīr meñ hai

chāñd ke ras meñ bujhe lamhoñ kī tanhā.ī meñ
zahr-e-hijrāñ meñ hai Duubī huī talvār havā

shukr kar hujra-e-tanhā.ī meñ baiThe hue shaḳhs
ḳhud se milne kī ye mohlat bhī na ho to kyā ho

ehtiyātan dekhtā chal apne saa.e kī taraf
is tarah shāyad tujhe ehsās-e-tanhā.ī na ho

tanhā.ī kī qabr se uTh kar maiñ saḌkoñ par kho jaatā huuñ
chehroñ ke gahre sāgar meñ murda āñkheñ pheñk aatā huuñ

chupke chupke rotā hai tanhā.ī meñ
vo jo shahr ke har mele kā baanī hai

hamārā shām-e-tanhā.ī meñ pursāñ hī na thā koī
vo jis mahfil meñ jaate the vahīñ yāroñ kā melā thā

riit tanhā.ī fāsla sahrā
kaun sī bhuuk de gayā sahrā

apnī tanhā.ī meñ mahbūs huuñ muddat se 'nadīm'
tū agar saath ho dīvār meñ dar khul jaa.e

dasht-e-tanhā.ī meñ uThte rahe ḳhush-rañg sarāb
rañg kī lahroñ pe khilte rahe nasrīn-o-gulāb

sham.a bechārī jo ik mūnis-e-tanhā.ī thī
bujh ga.ī vo bhī sar-e-shām havā aane se

hijr ke be-sadā jazīre par
kunj-e-tanhā.ī meñ koī laḌkī

kaan bajte haiñ sukūt-e-shab-e-tanhā.ī meñ
vo ḳhamoshī hai ki ik hashr bapā ho jaise

kis tarah tai ho safar tanhā.ī kā
duur tak haiñ aa.ine rakkhe hue

dasht-e-tanhā.ī meñ yādoñ ke darindoñ se Darūñ
bach-bachā ke bhiiḌ meñ aa.uuñ to phir tanhā rahūñ

kam se kam apnā bharam to nahīñ khoyā hotā
dil ko ronā thā to tanhā.ī meñ royā hotā