Tags-Tanhai

dasht-e-ġhurbat meñ bhī zānū-e-dost par merī tanhā.ī ko ye ta.assur huā
bhūlā-bhaTkā huā ik musāfir koī yak-ba-yak jaise apne dayār aa gayā

be-maqsad mahfil se behtar tanhā.ī
be-matlab bātoñ se achchhī ḳhāmoshī

tanhā.ī meñ chauñkā detī hai aksar
sannāTe se bāteñ kartī ḳhāmoshī

raat tanhā.ī ne kamre meñ jo karvaT badlī
niiñd āñkhoñ ko kisī saañp ke phan jaisī lagī

ik yahī to mirā hamrāz thā tanhā.ī kā
dard ko dil kī havelī meñ chhupā.e rakkhā

ye kyā ki maiñ hī sahe jā.ūñ rañj-e-tanhā.ī
mirī tarah kabhī us kā jī udaas to ho

dil bahal jaa.e to tanhā.ī kī kulfat bhī miTe
shab-e-furqat kī balāoñ ko to aa jaane do

ḳhauf tanhā.ī ghuTan sannāTā
kyā nahīñ mujh meñ jo bāhar dekhūñ

nahīñ kuchh tere baa.is ye udāsī bad-gumāñ mat ho
jahāñ jaatā huuñ mere saath ye tanhā.ī jaatī hai

ajab mahfil hai sab ik dūsre par hañs rahe haiñ
ajab tanhā.ī hai ḳhalvat kī ḳhalvat ro rahī hai

rifāqat ko mirī tanhā.ī bhūlī-bisrī yādoñ se
koī saaya uThā laa.ī koī chehra uThā laa.ī

maut se aage tak ke manzar dekhe haiñ
tanhā.ī se yūñhī Dar nahīñ jaatā maiñ

tamām raat koī bhī na thā mire ghar meñ
lipaT ke soī thī tanhā.ī mere bistar se

dil dabā jaatā hai kitnā aaj ġham ke baar se
kaisī tanhā.ī Tapaktī hai dar o dīvār se

laraztī chhat shikasta bām-o-dar se baat karnī hai
mujhe tanhā.ī meñ kuchh apne ghar se baat karnī hai

jo ham se raat meñ tanhā.ī ham-kalām huī
sañvar gayā mire jazboñ kā aaj saarā ḳham

ek to jāñ-gusil hai tanhā.ī
is pe ham-sā.egī qayāmat hai

apnī vus.at ko nikaltā ye hujūm
merī tanhā.ī se uljhā thā kabhī

Thahro Thahro mire asnām-e-ḳhayālī Thahro
merā dil gosha-e-tanhā.ī meñ ghabrā.egā

do ghaḌī dil ke bahlāne kā sahārā bhī gayā
lījiye aaj tasavvur meñ bhī tanhā.ī hai