Tags-Tanhai

zindagī ko alvidā.a kah kar chalā jā.ūñgā maiñ
jab mirī tanhā.ī mujh ko dar-ba-dar karne lage

achānak TuuT jaa.e qasr-e-tanhā.ī
koī āvāz khiḌkī kholtī jaa.e

sunñe vāloñ ko dhaḌaktī huī tanhā.ī meñ
kaun dar aatā hai chupke se tamannā ban kar

yaar pahlū meñ hai tanhā.ī hai kah do nikle
aaj kyuuñ dil meñ chhupī baiThī hai hasrat merī

tanhā.ī udāsī ye siyah-rāt ye jal-thal
aise meñ to ik TuuTā sitāra bhī bahut thā

bahut arsa rahe haiñ saath us ke
so ab tanhā.ī bhī kuchh roz jheleñ

rāste band the lāshoñ se paTī galiyoñ meñ
bhiiḌ sī bhiiḌ thī tanhā.ī sī tanhā.ī thī

kabhī tanhā.ī meñ baiTho to faqat rote raho
phir achānak hī kabhī hañsne-hañsāne lag jaao

sāmne aao to jaise ki gul-e-tar koī
aur tanhā.ī meñ phir ashk bahāne lag jaao

āsmāñ zahrāb-manzar gum-shuda bezāriyāñ
lams tanhā.ī kā lagtā hai mujhe Dastā huā

jaltī huī sham.oñ ne aksar ehsās kī raakh ko bhaḌkāyā
qurbat meñ damakte chehroñ kī tanhā.ī ke dukh yaad aa.e haiñ

jo ta.amīr kī kunj-e-tanhā.ī meñ
vo dīvār apne hī sar par girī

is ḳharābe ke muqaddar meñ faqat sannāTā
apnī tanhā.ī ko ik jism banāyā maiñ ne

ḳhud apne se milne kā to yaarā na thā mujh meñ
maiñ bhiiḌ meñ gum ho ga.ī tanhā.ī ke Dar se

raah dekhī nahīñ aur duur hai manzil merī
koī saaqī nahīñ maiñ huuñ mirī tanhā.ī hai

kabhī kabhī tanhā.ī meñ yuuñ lagtā hai
jaise kisī kā haath hai mere shānoñ par

dasht-e-tanhā.ī ke tapte hue vīrāne meñ
terī yādoñ kā hai ik peḌ jo shādāb bhī hai

tanhā.ī meñ shām-e-furqat kī ye soch ke ḳhush hai jī apnā
aa.egā manā leñge us ko jaise vo idhar aatā hī to hai

tū na kar apnī mahfiloñ ko udaas
raas hai ham ko rañj-e-tanhā.ī

gūñjtā shahroñ meñ tanhā.ī kā sannāTā to hai
be-kasī kā ham-navā ab tak vahī saayā to hai