Tags-Tanhai

bazm ho yā tanhā.ī ho
har jā dil ko raas hai tū

tasavvur hī sahārā ban gayā hai
ajab tanhā.ī sī hai aur maiñ huuñ

shahr-e-tanhā.ī meñ mausam nahīñ badlā karte
din bahut chhoTā yahāñ raat baḌī hai ab bhī

raat din ke hañgāme ek muhīb tanhā.ī
sub.h-e-zīst bhī tanhā shām-e-zīst bhī tanhā

abhī tak yaad hai kal kī shab-e-ġham aur tanhā.ī
phir is par chāñd kā Dhalnā 'qamar' āhista āhista

apnī tanhā.ī bhī kuchh kam na thī masrūf 'vasīm'
is liye chhoḌ diyā anjuman-ārā.ī ko

tujh ko sochā to patā ho gayā rusvā.ī ko
maiñ ne mahfūz samajh rakkhā thā tanhā.ī ko

dard-e-tanhā.ī se mar jaanā to kuchh mushkil na thā
kyā kaheñ ġham se magar kuchh ahd-o-paimāñ ho ga.e

zaḳhm-e-furqat ko tirī yaad ne bharne na diyā
ġham-e-tanhā.ī magar ruḳh pe ubharne na diyā

bhāne lagī jab dil ko zarā bazm kī raunaq
tanhā.ī mirī aa ga.ī phir mujh ko manāne

tujh se mil kar bhī na tanhā.ī miTegī merī
dil meñ rah rah ke yahī baat khaTaktī kyuuñ hai

tum ko kyā mālūm mirī tanhā.ī ne
lafzoñ meñ apne jazbāt samo.e haiñ

akasr tanhā.ī se mil kar ro.e haiñ
ham ne apne ashk aag se dho.e haiñ

tanhā.ī ke saaz pe chheḌe saare dard sadāoñ ke
vahshat ke āñchal se lipTe aur use zanjīr kiyā

āñkheñ phūTeñ jo jhapaktī bhī hoñ
shab-e-tanhā.ī meñ kaisā sonā

phir dil ne kahā hañs ke vo sahrā ho qafas ho
jab us se bichhaḌnā hai to tanhā.ī bhī kyā hai

har sadā se bach ke vo ehsās-e-tanhā.ī meñ hai
apne hī dīvār-o-dar meñ gūñjtā rah jā.egā

añdherī raat zindāñ paañv meñ zanjīr-e-tanhā.ī
is aalam meñ mar jā.egā dīvāna to kyā hogā

kohre meñ ghirī shaam kī Dolī se utar kar
tanhā.ī kī chaukhaT pe tirī yaar khaḌī hai

vo dard ki us ne chhīn liyā vo dard ki us kī baḳhshish thā
tanhā.ī kī rātoñ meñ 'inshā' ab bhī mirā mehmāñ hotā hai