Tags-Tanhai

be-sabab bhiiḌ meñ rahte haiñ vo bechain magar
merī tanhā.ī ko lamha bhī nahīñ de sakte

apnī yakjā.ī se tanhā.ī se puurā na huā
jitnā nuqsān huā shahr basāne meñ mirā

ik aag ġham-e-tanhā.ī kī jo saare badan meñ phail ga.ī
jab jism hī saarā jaltā ho phir dāman-e-dil ko bachā.eñ kyā

tanhā.ī ke darvāze se yādoñ kā samundar
lagtā hai ki jazbāt meñ sar maar rahā thā

ḳhud pūchhtī hai aap se tanhā.ī aap kī
mahtāb kyuuñ hai raat ke pahlū meñ sochiye

de gayā umr kī tanhā.ī mujhe
ek mahfil meñ milā thā mujh ko

ye raat aur ye Dastī huī sī tanhā.ī
lahū kā saaz 'qamar' tan-badan meñ bajtā hai

ye patthar sī tanhā.ī ye bhārī bojhal raat
jaane kaisā bojh hai dil par nas nas TuuTī jaa.e

ab TūTne hī vaalā hai tanhā.ī kā hisār
ik shaḳhs chīḳhtā hai samundar ke ār-pār

dīvār-o-dar pe ḳhushbū ke haale bikhar ga.e
tanhā.ī ke farishtoñ ne chūmī qabā-e-yār

umr kartā huuñ basar gosha-e-tanhā.ī meñ
jab se vo ruuTh ga.e, tab se alag baiThā huuñ

monis-e-shab rafīq-e-tanhā.ī
dard-e-dil bhī kisī se kam to nahīñ

koī bhī yaqīñ dil ko 'shād' kar nahīñ saktā
ruuh meñ utar jaa.e jab gumāñ kī tanhā.ī

hasrat-o-yās kā amboh magar maiñ bekas
aise majme.a meñ ye aalam mirī tanhā.ī kā

niiñd un kī agar uḌ jaa.e to kuchh duur nahīñ
so gayā jāgne vaalā shab-e-tanhā.ī kā

tīrgī shām-e-lahad kī hai bhayānak lekin
hai ye utrā huā jaama shab-e-tanhā.ī kā

ḳhuub vaqt aa.e nakīrain jazā degā ḳhudā
lahd-e-tīra meñ bhī kyā ālam-e-tanhā.ī thā

shab-e-furqat meñ dil-e-ġham-zada bhī paas na thā
vo bhī kyā raat thī kyā ālam-e-tanhā.ī thā

pūchhte kyā ho jo hāl-e-shab-e-tanhā.ī thā
ruḳhsat-e-sabr thī yā tark-e-shakebā.ī thā

akelā-pan dar-o-dīvār se Tapaktā hai
kahāñ ga.e mirī tanhā.ī bāñTne vaale