Tags-Tanhai

ek paimān-e-vafā ḳhāk-basar hai sar-e-shām
ḳhema ḳhālī huā tanhā.ī azā kartī hai

bad-gumāñ hote na the yuuñ tujh se ham
āj-kal rahtī hai tanhā.ī bahut

aañkh se TuuT ke barsā mire ḳhvāboñ kā lahū
dil kī dahlīz pe tanhā.ī ne jab sajda kiyā

ḳhalvat-e-zāt hai aur anjuman-ārā.ī hai
bazm sī bazm hai tanhā.ī sī tanhā.ī hai

āshnā koī nazar aatā nahīñ yaañ ai 'havas'
kis ko maiñ apnā anīs-e-kunj-e-tanhā.ī karūñ

haa.e vo bāteñ jo kah sakte nahīñ
aur tanhā.ī meñ dohrāte haiñ ham

maiñ apnī tanhā.ī se shāyad aajiz thā
is aahaT kā varna kaise ḳhayāl huā

pahuñchī us but ko ḳhabar nāla-e-tanhā.ī kī
mudda.ī kaun khaḌā thā sar-e-dīvār lagā

sub.h-dam soḳhta-sāmān musāfir bhī ga.e
phir vahī ham vahī tanhā.ī vahī hāl-e-zabūñ

chal 'qaisī' mele meñ chal kyā ronā tanhā.ī kā
koī nahīñ jab terā merā sab mere sab tere

us ke hote bhī maiñ ik ehsās-e-tanhā.ī meñ huuñ
jalva-gar hai vo jo muddat se dil-e-āgāh meñ

vo tanhā.ī kā ḳhūb-sūrat hujūm
vo mela sar-e-āb-jū raat bhar

khaḌā mele meñ aksar sochtā huuñ
mire andar to tanhā.ī bahut hai

dīvār na dar sunsān khañDar aisā ujḌā ye dil kā nagar
tanhā.ī ke vīrāne meñ āvāz bhī Thokar khaa.e hai

hañgāme se vahshat hotī hai tanhā.ī meñ jī ghabrā.e hai
kyā jāniye kyā kuchh hotā hai jab yaad kisī kī aa.e hai

mujh ko tanhā.ī ne diyā hai janam
merā sab kuchh akele-pan se hai

beḌiyāñ vahm-e-ta.alluq kī na.ī pahnā ga.e
dost aa kar kāTte zanjīr tanhā.ī to kyā

kuchh to tanhā.ī kī rātoñ meñ sahārā hotā
tum na hote na sahī zikr tumhārā hotā

koī kyā jaane ki hai roz-e-qayāmat kyā chiiz
dūsrā naam hai merī shab-e-tanhā.ī kā

kunj-e-tanhā.ī meñ khiltā hai taḳhayyul merā
aur maiñ ḳhush huuñ ki ye gul phir se nikharne ko hai