Tags-Tanhai

ab to bas guzrī huī umr basar kartā huuñ
merī tanhā.ī ḳhamoshī bhī hai taqrīr bhī hai

sukūt khulne lagā hai
tanhā.ī chahchahātī hai bām-o-dar par

yuuñ to tanhā.ī meñ ghabrā.e bahut
mil ke logoñ se bhī pachhtā.e bahut

ḳhatm huā har ḳhvāb-e-tamāshā raakh huā har shahr-e-sadā
dasht hai har sū tanhā.ī kā hue haiñ ham bedār kahāñ

ye bār-e-ma.asiyat manzil kaḌī aur shām-e-tanhā.ī
chale haiñ kyā samajh kar ham bhī rusvā-e-jahāñ ho kar

maiñ ki darpesh hai mujh ko safar-e-dūr-o-darāz
aur ik vo haiñ ki un ko ġham-e-tanhā.ī hai

ek muddat par ḳhayāl un kā kahāñ se aa gayā
kitnī achchhī anjuman lagtī hai tanhā.ī ke ba.ad

ghar meñ rakhtā huuñ agar shor machātī hai bahut
merī tanhā.ī ko bāzār kī bīmārī hai

maiñ bhī zanjīr nahīñ hotā kisī vahshat se
vo bhī tanhā.ī se bachne kī duā jāntā hai

chup rahe to shahr kī hañgāma ārā.ī milī
ab agar khole to ham ko qaid-e-tanhā.ī milī

jo jalā raat kī tanhā.ī meñ us par bhī 'ḳhayāl'
bevafā.ī kā hai ilzām tumheñ kyā ma.alūm

ye tirī yaad kā aalam shab-e-tanhā.ī meñ
jaise lahrā ke kiran kaalī ghaTā se chhūTe

tere baad aisī bhī tanhā.ī kī manzil aa.ī
ki mirā saath kisī rāhguzar ne na diyā

vo ḳhud meñ mukammal hai to phir kyūñkar vo ḳhud meñ rah na sakā
kyuuñ bikhar gayā zarra zarra kyuuñ sah na sakā vo tanhā.ī

donoñ meñ kitnā farq magar donoñ kā hāsil tanhā.ī
apnoñ meñ duurī laatī hai vo shohrat ho yā rusvā.ī

pai-ba-pai aa.e sajal tāroñ ke mānind ḳhayāl
merī tanhā.ī pe shab husn jhamā-jham barsā

vo hotā to phir bhī shāyad dard pe kuchh qaabū rahtā
tanhā.ī se tanhā laḌnā kuchh aisā āsān nahīñ

ham par jo guzartī hai use kis ko batā.eñ
tanhā.ī kī āġhosh meñ sadiyoñ se paḌe haiñ

hujūm-e-shahr ki jis kī mulāzmat meñ huuñ maiñ
mire liye mirī tanhā.ī kā idāra banā

tanhā.ī kā sannāTā aur aatī jaatī rāteñ
terī yaad na aur koī ġham phir bhī niiñd na aa.e