Tags-Tanhai

kaash tum mujh se nafrat kartīñ to maiñ vāpas tanhā.ī ke tane meñ chhup jaatā
jahāñ mere aañsū shāḳhoñ par ugte

tamām umr chale mere saath tanhā.ī
ġharaz hī kyā hai mujhe kārvāñ banā.ūñ koī

kitne chehre kitnī shakleñ phir bhī tanhā.ī vahī
kaun le aayā mujhe in ā.īnoñ ke darmiyāñ

maiñ huuñ dil hai tanhā.ī hai
tum bhī hote achchhā hotā

raat kī zulfeñ bhīgī bhīgī aur aalam tanhā.ī kā
kitne dard jagā detā hai ik jhoñkā purvā.ī kā

karb-e-tanhā.ī mirī ruuh kā kartī hai siñghār
zahr ehsās kā gholūñ to siyah raat kaTe

umr bhar ḳhush aa.egī kyā merī tanhā.ī mujhe
rābta har chand logoñ se nahīñ rakkhūñgā maiñ

apnī tanhā.ī kī palkoñ ko bhigo luuñ pahle
phir ġhazal tujh pe likhūñ baiTh ke ro luuñ pahle

vo ḳhvāb kyā thā ki jis kī hayāt hai ta.abīr
vo jurm kyā thā ki jis kī sazā hai tanhā.ī

jab bhī tanhā.ī ke hañgāmoñ se dam ghuTne lage
bhiiḌ meñ gum ho ke an-jānoñ kī bastī meñ chalo

kunj-e-mehan hai dār-o-rasan hai zulmat hai tanhā.ī hai
kaun sī jā hai ham-safaro le aa.ī talāsh-e-yār kahāñ

shab-e-tanhā.ī jūñ-tūñ kaT rahī hai
ġham-e-furqat ke maare so chuke haiñ

tanhā.ī hai ġharībī hai sahrā hai ḳhaar hai
kaun āshnā-e-hāl hai kis ko pukāriye

tujh ko shikva hai yahāñ aa ke tujhe bhuul ga.e
ham bhalā kis se qafas meñ ġham-e-tanhā.ī kaheñ

maiñ thā aur phuul the ik gosha-e-tanhā.ī meñ
ham se kuchh duur parinde bhī the gahrā.ī meñ

lazzat-e-vasl se bhī baḌh ke maza aa.egā
apnī tanhā.ī se dil apnā lagā kar dekho

ham baras paḌte the 'shāz' apnī hī tanhā.ī par
abr kī tarah kisī dar se uThā karte the

ab nāzuk nāzuk zehnoñ par faulādī hamla hogā
shīshoñ ke paikar pighleñge pathrīlī tanhā.ī meñ

shīsha kah lo patthar kah lo kabhī bhī kah luuñ is dil ko
maiñ ne is afsurda shai ko tanhā.ī se joḌ diyā