Tags-Tanhai

añgḌā.ī par añgḌā.ī letī hai raat judā.ī kī
tum kyā samjho tum kyā jaano baat mirī tanhā.ī kī

ḳhud kī tanhā.ī ai 'afsar' hai muqaddar lekin
apnī ehsās kī samtoñ ko na tanhā karnā

dasht-o-sahrā se guzartī huī tanhā.ī ne
rāste bhar ke liye us kī sadā māñgī thī

ghar kī tanhā.ī se kyoñ itne pareshāñ ho 'ziyā'
aao ik but ke havāle se basar raat kareñ

mujh ko tanhā.ī ne gherā hai ka.ī baar magar
us kī yādoñ ne magar saath nibhāyā hī nahīñ

kamar pe laad ke chalte rahoge tanhā.ī
tamām umr milegā nahīñ kahīñ koī ghar

al-madad ai raqs-e-vahshat aaj mar jā.eñge ham
ai junūñ is be-sabab tanhā.ī ke tanhā ilaaj

ghar kī tanhā.ī meñ yuuñ mahsūs hotā hai mujhe
jaise koī mujh ko mujh se chhīn kar le jā.egā

kāñch ke pīchhe chāñd bhī thā aur kāñch ke uupar kaa.ī bhī
tīnoñ the ham vo bhī the aur maiñ bhī thā tanhā.ī bhī

dar-o-dīvār pe shakleñ sī banāne aa.ī
phir ye bārish merī tanhā.ī churāne aa.ī

ab zarā chāhiye tanhā.ī meñ yaksūī mujhe
ab koī chāhne vaalā bhī nahīñ chāhiye hai

is lā-davā maraz kā asar pūchhte ho kyā
dil ne diyā na saath to tanhā.ī bhī ga.ī

dil mirā rotā hai tanhā.ī meñ pahroñ 'shevan'
vo buzurgoñ kī hidāyāt kahāñ se lā.ūñ

jab mire bhaag meñ tanhā.ī kā añdhiyārā hai
phir bhalā prem kī parbhāt kahāñ se lā.ūñ

maiñ jāntā huuñ merī tarah chāhtī ho tum
tanhā.ī se najāt mirī baat maan lo

apnī tanhā.ī pe nāzāñ ho mire sāda-mizāj
apne suune dar o dīvār ke gun gaate ho

hai gosha-e-tanhā.ī manzūr mujhe 'beḳhud'
is bazm meñ jaanā to jī aur jalānā hai

karb-e-tanhā.ī hai vo shai ki ḳhudā
aadmī ko pukār uThtā hai

duur tak bas ik dhundalkā gard-e-tanhā.ī kā thā
rāstoñ ko ranj merī ābla-pā.ī kā thā

mai-kada aur bhī tanhā.ī kā sāmāñ niklā
ham ki tanhā.ī se tañg aa ke yahāñ baiThe the