Tags-Tasawwur

tasvīr-e-yār mujh ko tasavvur banā chukā
par shukr hai ḳhudā kā pareshāñ nahīñ rahā

baḳhiya-garī-e-dil ke tasavvur meñ gum hue
goyā ḳhayāl-e-jumbish-e-mizhgāñ nahīñ rahā

tasavvur se aage taḳhayyul se aage
mire dil kī vahshat kahāñ tak na pahuñchī

tasavvur bhuul jaatā hai ḳhudā ko
ye Takrāyā hai jab āh-o-fuġhāñ se

nazar meñ raqs-kunāñ hai tasavvur-e-ruḳh-e-dost
ye kah do bād-e-sabā se dabe qadam guzre

na vo nashāt-e-tasavvur ki lo tum aa hī ga.e
na zaḳhm-e-dil kī hai sozish koī jo sahnī ho

har ghaḌī terā tasavvur har nafas terā ḳhayāl
is tarah to aur bhī terī kamī baḌh jā.egī

'sirāj' us kāba-e-jāñ ke tasavvur kuuñ kiyā sumran
yahī vird-e-sahar hai aur duā-e-shām ai vaa.iz

havā-e-dasht ye tāsīr-e-ḳhud-farāmoshī
bahut dinoñ se tasavvur meñ ghar nahīñ aatā

abhī se merī nigāheñ is daur ke tasavvur ko chhū rahī haiñ
bujhī bujhī be-kasoñ kī aahoñ pe bijliyoñ kā gumāñ rahegā

'nasīr' us shoḳh se kahnā ki pesh-e-chashm-e-hairat meñ
tasavvur roz-o-shab terā ham ai jānāna rakhte haiñ

rañgoñ kā tasavvur bhī uḌā aañkh se ab to
is shahr meñ ab kaise guzārā kare koī

vo jis ko bhūlne kā tasavvur muhāl thā
vo ahd rafta rafta mujhe bhūltā gayā

intihā ho ga.ī āzād-dahī kī sayyād
ham tasavvur meñ bhī gulzār ko dekhā na kareñ

hazār baar tasavvur ke shahr se guzrā
vo ek sher jo dīvān meñ nahīñ aayā

ik husn-e-tasavvur hai jo ziist kā sāthī hai
vo koī bhī manzil ho ham log nahīñ tanhā

tasavvur ek zehnī justujū kā naam hai shāyad
dil un ko DhūñDh kar laatā huā mahsūs hotā hai

nigāhoñ meñ ḳhumār aatā huā mahsūs hotā hai
tasavvur jaam chhalkātā huā mahsūs hotā hai