Tags-Tasweer

har rañg hamārā hai, har ik rañg meñ ham haiñ
tasvīr hue vaqt kī raftār meñ ham log

dilrubā ma.alūm hotī haiñ mujhe tanhā.iyāñ
naqsh har shai kā mujhe tasvīr-e-jānāñ ho gayā

baḌhā rahī haiñ mire dukh nishāniyāñ terī
maiñ tere ḳhat tirī tasvīr tak jalā dūñgā

ḳhushbū hamāre pyaar kī us tak pahuñch ga.ī
tasvīr e'tibār kī us tak pahuñch ga.ī

tumhārā husn vo tasvīr-e-husn-e-kāmil hai
ḳhudā ne ḳhaas hī lamhoñ meñ jo banā.ī ho

maslahat koī to darpesh thī 'shārib' varna
us ne tasvīr par ye rañg ubhārā phir kyuuñ

hairatī fasl-e-chaman meñ huī sarsabz aisī
sabza ruḳhsāra-e-tasvīr se āġhāz huā

andar kā dukh bāhar le kar ā.ūñgī
maiñ ne bhī tasvīr banānā siikh liyā

ghar meñ vo ik purānī sī tasvīr thī ki hai
sail-e-balā kā zor ghaTe to pata chale

mujh pe tasvīr lagā dī ga.ī hai
kyā maiñ dīvār dikhā.ī diyā huuñ

merī tasvīr banāne ko jo haath uThtā hai
ik shikan aur mire māthe pe banā detā hai

detī hai vahshat-e-dil phir mujhe ta.abīr-e-bahār
jalva-gar ḳhvāb meñ rahne lagī tasvīr-e-bahār

ik tasvīr nihāñ thī vaqt ke parde meñ
ġhaur se jo maiñ ne pahchānī merī thī

aañkh se aañkh aur dil se dil jab milā jaane un kī nigāhoñ ne kyā kar diyā
merī āñkhoñ meñ us roz se ai 'sabā' khiñch ke tasvīr-e-jām-o-subū rah ga.ī

maiñ banātā huuñ taḳhayyul ke qalam se paikar
merī tahrīr mire dard kī tasvīr meñ aa

dil ābād kahāñ rah paa.e us kī yaad bhulā dene se
kamra vīrāñ ho jaatā hai ik tasvīr haTā dene se

kis taur se āḳhir unheñ tasvīr kareñ ham
jo ḳhvāb azal se koī chehra nahīñ rakhte

tasvīr us kī ghar meñ lagāne kī der thī
mālik-makān mujh ko uThāne pe aa gayā