Tags-Tasweer

muskurānā zer-e-lab har vaqt hī
koī sīkhe aap kī tasvīr se

dil meñ terī yaad se hai raushnī
aañkh raushan hai tirī tasvīr se

taire va.ade tirī amānat haiñ
par vo tasvīr jo chhupā kar dī

paas apne ho agar tasvīr-e-yār
zindagānī kā sahārā ḳhuub hai

ek manzar thā yaad rakhne kā
ek tasvīr thī banāne kī

jise sambhāl ke rakh le zamāna yādoñ meñ
vo apnī zaat kī tasvīr chāhtā hai dil

hameñ dushvāriyoñ meñ muskurāne kī talab thī
ham ik tasvīr sā banñe kī koshish kar rahe the

jhilmilāte qumqumoñ kī raah meñ zanjīr sī
raat ke hāthoñ meñ din kī mohnī tasvīr sī

mohabbat āḳhirash le aa.ī hai ik band kamre meñ
terī tasvīr ab dekhūñgā ḳhud tasvīr hone tak

us ke baġhair zindagī kitnī fuzūl hai
tasvīr us kī dil se judā kar ke dekhte

naqsh-e-ḳhayāl aap kī tasvīr ban gayā
ye mo.ajiza huā hai numāyāñ kabhī kabhī

ba-juz tasvīr-e-gul ke baaġh meñ dekhūñ to kyā dekhūñ
aqīdat ke asar meñ ḳhud se be-zārī bhī shāmil hai

ek chehrā mujhe rozāna sukūñ detā hai
ek tasvīr mujhe roz rulā detī hai

phuul sī har tasvīr meñ zehn kī dīvāroñ se utaar chukā huuñ
phir bhī dil meñ kāñTā sā kyuuñ rah rah kar chubhtā rahtā hai

yaad rakkhe mujhe duniyā tirī tasvīr ke saath
rañg aise tirī tasvīr meñ bhar jā.ūñgā

ab lāzim hai ki tasvīr kiye jaa.eñ
ḳhāmoshī ki tah aag kā bātin aur

tasvīr-e-nā-shuda timsāl
kabhī nahīñ Tiktī us aa.ine kī phisalavāñ satah par

ḳhāmoshī hamesha se utnī hī gahrī hai
jitnī ki canvas se māvarā tasvīr

tujh se tasvīr terī achchhī hai
ba.ad muddat bhī vo na badlī hai

vo shāyad is liye tasvīr ban ke baiThā rahā
faqat suḳhan hī nahīñ hasrat-e-suḳhan bhī to ho