Tags-Tauba

qaazī kā irāda hai ki hai mai kā muchalka
tauba dar-e-mai-ḳhāna pe dene ko Dhahī hai

piine se kar chukā thā maiñ tauba magar 'jalīl'
bādal kā rañg dekh ke nīyat badal ga.ī

'beḳhud' yahī to umr hai aish o nashāt kī
dil meñ na apne tauba kī Thāneñ abhī se aap

jām-e-ḳhush-rañg tahī hai mujhe ma.alūm na thā
apnī TuuTī huī tauba pe hañsī aa.ī hai

ye hai mai-ḳhāna to phir aaj se merī tauba
sab yahāñ zāhid-o-dīñ-dār nazar aate haiñ

itnī rañgīn jo duniyā hai tirī hī to hai
kis tarah kufr kareñ ham yahāñ tauba kar ke

ġhunchoñ kā fareb-e-husn tauba kāñToñ se nibāh chāhtā huuñ
dhoke diye haiñ dostoñ ne dushman kī panāh chāhtā huuñ

phir aayā jām-ba-kaf gul-ezār ai vaa.iz
shikast-e-tauba kī phir hai bahār ai vaa.iz

vaah maiñ aur na aane ko kahūñgā tauba
maiñ to hairāñ huuñ ye baat aap ne farmā.ī kyā

'ḳhumār'-e-balā-nosh ki tū aur tauba
tujhe zāhidoñ kī nazar lag ga.ī hai

tauba ne jagāyā mire andar kā sharābī
ab faal bhī TuuTe hue sāġhar se nikālūñ

baḌe ġhurūr se kī hai zamīr ne tauba
jo tū mile kabhī tanhā to phir ḳhatā kar leñ

fuġhāñ nasīb kī vāraftagī are tauba
fuġhāñ nasīb ko vaj.h-e-fuġhāñ nahīñ ma.alūm

itnī pī hai ki ba.ad-e-tauba bhī
be-piye be-ḳhudī sī rahtī hai

kaise be-rahm haiñ sayyād ilāhī tauba
mausam-e-gul meñ mujhe kaaT ke par rakhte haiñ

tū ne tauba kī to hai lekin 'riyāz'
baat kā terī Thikānā kuchh nahīñ

tumhāre ġham se tauba kar rahā huuñ
ta.ajjub hai maiñ aisā kar rahā huuñ

añdhere bādaloñ se pūchh zāhid
mirī khoī huī tauba kahāñ hai

ab chhalakte hue sāġhar nahīñ dekhe jaate
tauba ke ba.ad ye manzar nahīñ dekhe jaate

fazā badalte hī jaag uTThī fitrat-e-mai-kash
shikast khā ga.ī tauba ghaTā se laḌte hue