Tags-Tauba

kaise sābit-qadam vo rahegā us kī tauba kā kyā haal hogā
jis ko sunte haiñ shaiḳh-e-haram se mai-kashī kī ijāzat milegī

ḳhair aur shar kī āmezish aur āvezish se nikhreñ
bhuul aur tauba karte saare saañs basar ho jaa.eñ

ai nāseh tū kyā kahtā hai vo aajiz hai mai-noshī se
le toḌ rahe haiñ sāġhar ko ham aaj hī tauba karte haiñ

tauba kī rindoñ meñ gunjā.ish kahāñ
jab ye aa.egī nikālī jā.egī

vaah maiñ aur na aane ko kahūñgā tauba
maiñ to hairāñ huuñ ye baat aap ne farmā.ī kyā

mai se tauba bhī hai lāzim tirī taqlīd bhī farz
kyā karūñ ab jo tire naqsh-e-qadam khīñchte haiñ

tauba tauba ye balā-ḳhez javānī tauba
dekh kar us but-e-kāfir ko ḳhudā yaad aayā

'adam' ne tauba to kar lī muġhanniyo! lekin
tum us ko raah pe laao bahār ke din haiñ

chamak rahī hai ye bijlī giregī tauba par
jhalak rahī hai mai-e-lāla-fām miine meñ

shiddat-e-ehsās-e-tauba kā vo aalam hai 'urūj'
jaam mere sāmne hai maiñ ḳhudā ke sāmne

darvāza mai-kade kā na kar band mohtasib
zālim ḳhudā se Dar ki dar-e-tauba baaz hai

apne hī saaya se Dartā huuñ ilāhī tauba
is tarah se kabhī andesha-e-fardā to na thā

koī āvāz-e-shikast-e-jām hai
tauba tauba har taraf kohrām hai

mausam-e-gul hai bādal chhā.e khanak rahe haiñ paimāne
kaisī tauba, tauba tauba, tauba nazr-e-jām karo

pī ke kar letā huuñ tauba jab se ye dastūr hai
dil bhī raushan hai mirā muñh par bhī mere nuur hai

kareñ kyā rind tauba mai se zāhid
ki ye to un kī ghuTTī meñ paḌī hai

sho.ala-e-ishq kā asar tauba
mom jaisā pighal gayā patthar

ḳhatāoñ kī sazā āḳhir milegī
rulā.egā use tauba na karnā

ham ko kyā kaam kisī aur parī se tauba
aap bhī ḳhuub haiñ be-par kī uḌāne vaale

gar kabhī ronā hī paḌ jaa.e to itnā ronā
aa ke barsāt tire sāmne tauba kar le