Tags-Aagahi

ye āgahī hai jo kartī hai mujh ko zaat meñ gum
phir is ke ba.ad maiñ hotā huuñ shash-jahāt meñ gum

āgahī kā sadqa vājib hai uThāo jām-e-zahr
lamha lamha vaqt kā isrār baḌhtā jaa.e hai

kamandeñ pheñkiye aql o ḳhirad kī
fasīl-e-āgahī TuuTī nahīñ hai

tere dil meñ koī ġham merā numā.inda nahīñ
āgahī terī mizha par abhī raḳhshanda nahīñ

jab dil kī dhaḌkanoñ se mile dars-e-āgahī
phir kis liye junūñ meñ koī intishār ho

āgahī dām-e-shunīdan jis qadar chāhe bichhā.e
mudda.ā anqā hai apne ālam-e-taqrīr kā

'āzar' hai ik tasalsul-e-inkār-o-āgahī
roz-e-azal se jo mire idrāk meñ rahā

rasā.ī manzil-e-maqsūd tak mumkin sī lagtī thī
ba-zāhir āgahī ke marhale āsān the lekin

be-ḳhudī to zarā ġhanīmat thī
jān-levā hai āgahī tauba

mujhe apne aap pe maan thā ki na jab talak tirā dhyān thā
tū misāl thī mirī āgahī tū kamāl-e-be-ḳhabarī rahī

ham āgahī ko rote haiñ aur āgahī hameñ
vāraftagi-e-shauq kahāñ le chalī hameñ

jilau meñ tābish-e-qindīl-e-āgahī le kar
bujhā diye haiñ mohabbat ne ahrman ke charāġh

maiñ tishna-lab huuñ sar-e-dasht-e-āgahī kab se
sabīl tū hai to sahrā-e-justujū meñ aa

āgahī sūd-o-ziyāñ kī koī mushkil bhī nahīñ
hāsil-e-umr magar umr kā hāsil bhī nahīñ

baste jaate haiñ nagar dil haiñ tabāh o vīrāñ
āgahī dushman-e-duniyā-e-sukūñ hai ki nahīñ

jo zehan, āgahī kī kār-gāh the
ḳhayāl kī dukān ban ke rah ga.e

aam ho kuchh to ye karb-e-āgahī
zaḳhm se chashma ubalnā chāhiye

dil ko jab āgahī kī aag lage
tab suḳhan soch ko suhāg lage

fareb thā aql-o-āgahī kā ki merī fikr-o-nazar kā dhokā
jo āḳhir-e-shab kī chāñdnī par huā thā mujh ko sahar kā dhokā

ḳhirad hai āḳhirī manzil junūñ kī
pareshāñ kyuuñ ho merī āgahī se