Tags-Aagahi

hai ajab kuchh mo.āmla darpesh
aql ko āgahī se ḳhatra hai

ba-faiz-e-āgahī ye kyā azaab dekh liyā
ki ḳhud hī apne kiye kā hisāb dekh liyā

junūñ ne rāz-e-haqīqat to pā liyā lekin
ḳhudā ko kho diyā zauq-e-ḳhud-āgahī ke liye

phir aur kyā hai agar zavāl-e-ḳhudī-o-ḳhud-āgahī nahīñ hai
dil-o-nazar ko ye kyā huā hai kahīñ bhī āsūdgī nahīñ hai

sharāb-e-talḳh pilāne kī baat kartā huuñ
ḳhud-āgahī ko jagāne kī baat kartā huuñ

fursat-e-āghī bhī dī lazzat-e-be-ḳhudī bhī dī
maut ke saath saath hī aap ne āgahī bhī dī

āgahī kā rizq kab maltā hai aur kis samt se
kāsa-e-zauq-e-nazar dar dar kahāñ le jāoge

fareb-e-nik.hat-o-rañg āgahī shikār na ho
karishma-kār-e-chaman meñ agar bahār na ho

fareb-e-shauq fareb-e-nazar fareb-e-ḳhayāl
hazār daam haiñ ik zauq-e-āgahī ke liye

ye to kahiye be-ḳhudī se mil ga.ī kuchh āgahī
varna dhokā de diyā thā chashm-e-bīnā ne mujhe

ham us farīq meñ nahīñ vo aur log haiñ
duniyā ke nek-o-bad se jo rakhte haiñ āgahī

ai ramz-e-āgahī maiñ tujhe ḳhud pe vā karūñ
vahshat ko mere paaoñ kī zanjīr se milā

kyuuñ mere lab pe aa.ī ġham-e-āgahī kī baat
gustāḳhī-e-ḳhirad kī sazā hai tamām umr

āgahī ne jab dikhā.ī rāh-e-irfān-e-habīb
but the jitne dil meñ sab qibla-numā hone lage

jaan le ki tere lab kuchh bhī nahīñ
āgahī ke zā.iqe ke sāmne

yahī samjhā huuñ bas itnī huī hai āgahī mujh ko
na raas aa.egī shāyad zindagī-bhar zindagī mujh ko

chāhtī hai āḳhir kyā āgahī ḳhudā-ma.alūm
kitne rañg badlegī zindagī ḳhudā-ma.alūm

be-sabab sochne vaale kabhī sochā tū ne
āgahī kasrat-e-afkār meñ kho jaatī hai

lazzat-e-ḳhud-āgahī kā faiz hai 'ārif' ki ham
pahroñ apne aap se rahte haiñ mahv-e-guftugū

thā pā-shikasta aañkh magar dekhtī to thī
maanā vo be-amal thā magar āgahī to thī