Tags-Awaz

lafzoñ ko tartīb meñ rakh kar paḌhtā huuñ har mahfil meñ
lahje kī imdād se maiñ āvāz ko bhārī kartā huuñ

āvāz ko to kaun samajhtā ki duur duur
ḳhāmoshiyoñ kā dard-shanāsā nahīñ milā

ik āvāz ubhartī aa rahī hai
dūdhiyā sī raushnī ik

qat.a-e-manāzil maiñ karūñ to kis sahāre par karūñ
mafqūd ahl-e-kārvāñ masdūd āvāz-e-jaras

jū-e-nashāt ban ke bahā le ga.ī mujhe
āvāz thī ki sāz-e-javānī kā aks thā

raat zanjīr kī āvāz jo kuchh tez huī
sub.h dīvār pe dīvār uThā dī us ne

nuqra.ī āvāz meñ lafzoñ kā nuur
apne hamrāhī ke dil par naġhma-bār

sun kar tujhe mad.hosh zamāna hai mujhe dekh
jis ne tirī āvāz ko dekhā hai ka.ī baar

mere nāloñ meñ nihāñ soz bhī hai saaz bhī hai
merī āvāz meñ shāmil tirī āvāz bhī hai

koī āvāz jab bhī sansanātī hai
kabhī sunsān rātoñ meñ

kuchh ujḌī māñgeñ shāmoñ kī
āvāz shikasta jāmoñ kī

yahīñ kahīñ se vo āvāz de rahā hai magar
navāh-e-jāñ meñ mirā nā-ḳhudā kab aa.egā

TuuTā huā hai shāyad vo bhī hamāre jaisā
āvāz us kī jaise jhankār lag rahī thī

kyā terā bigaḌtā hai agar chāndnī shab tū
ik baar mujhe phir merī āvāz sunā de

is girya-e-paiham kī aziyyat se bachā de
āvāz-e-jaras ab ke baras mujh ko hañsā de

dekh tanhā mirī āvāz kahāñ tak pahuñchī
kyā safar tai nahīñ hote haiñ rifāqat ke baġhair

tirī āvāz jagā.egī samā.at meñ fusūñ
terī sūrat mujhe andhā nahīñ hone degī

inhī guloñ se ab āThvīñ sur kī mīThī āvāz aa rahī hai
jinhoñ ne hijrāñ kī raat larzish ke ḳhaas unsur ko kam rakhā thā

fazā meñ naġhma-e-āvāz-e-pā hai mere liye
karāñ se tā-ba-karāñ ik nidā hai mere liye

tum ho muḳhtār ye dil kī āvāz hai āḳhir is baat meñ kaun sā raaz hai
jis ko nisbat tumhāre hī dar se rahī vo muqaddar bhī tum ne sañvārā nahīñ