Tags-Awaz

shahr āvāz kī jhilmil se damak uTTheñge
shab-e-ḳhāmosh kī ruḳh sham-e-navā rakhte haiñ

sub.h kī dahlīz par sote haiñ ab bhī qāfile
vaqt ke sahrā meñ āvāz-e-azāñ kuchh bhī nahīñ

ek saa.e kī tarah be-āvāz
mere dar par khaḌā rahā koī

andoh ba-dāmāñ na ho ḳhud mauj-tarannum
āvāz kā har sho.abada naġhmā to nahīñ hai

taḳhlīq kise kahte haiñ hai azmat-e-fan kyā
āvāz-faroshoñ ke liye sher-o-suḳhan kyā

ġharīb-e-shahr navā hī sahī magar yaaro
bahut hai apnī hī āvāz kā dayār mujhe

gar tire vāste dil dhaḌke to zinda tū hai
dil kī āvāz hai āvāz-e-pareshāñ se alag

kar bulbul o tā.ūs kī taqlīd se tauba
bulbul faqat āvāz hai tā.ūs faqat rañg

merī āvāz ḳhamoshī ne mujhe lauTā dī
mujh meñ ab jur.at-e-goyā.ī kahāñ se aa.e

jaan to chiiz hai kyā rishta-e-jāñ se aage
koī āvāz diye jaa.e maiñ aa.e jā.ūñ

ġhumbad-e-zāt meñ jab gūñjne lagtā huuñ bahut
ḳhāmushī toḌ ke āvāz bhī kar letā huuñ

kaun detā hai ruuh ko āvāz
jab haram meñ azaan hotī hai

maiñ jin ko chhoḌ aayā thā shanāsā.ī kī bastī ke vo saare rāste āvāz dete haiñ
nahīñ mālūm ab kis vāste āvāz dete haiñ

sūkhe hue pattoñ meñ āvāz kī ḳhushbū hai
alfāz ke sahrā meñ taḳh.īl kā aahū hai

hai kis kā intizār ki ḳhvāb-e-adam se bhī
har baar chauñk paḌte haiñ āvāz-e-pā ke saath

safed kāġhaz par
pencil ke chalne kī āvāz

mausam ne āvāz lagā.ī ḳhushbū ko
titlī kā dil phūloñ kī imlāk huā

raat aa jaa.e to phir tujh ko pukārūñ yā-rab
merī āvāz ujāle meñ bikhar jaatī hai

yuuñ bhī aksar tirī āvāz sunī hai maiñ ne
siskiyāñ letā ho jaise koī vīrāne meñ