Tags-Awaz

har samt pukārā hai āvāz nahīñ i
sannāTā hai sannāTā tanhā.ī hai tanhā.ī

jab jab baḌhegī zulmat-e-ġhārat-gar-e-yaqīñ
āvāz-e-haq pe kaTne na.e sar bhī ā.eñge

saa.e kī tarah reñg rahā huuñ zamīn par
guzre hue zamānoñ kī āvāz-e-pā liye

sar-e-koh-e-nidā ye pahlī pahlī ḳhāmushī hai
koī āvāz hai jis kā lagānā rah gayā hai

sā.at-e-īsviyāñ hai ki mirā dil jis meñ
ḳhud-ba-ḳhud choT lagī ḳhud-ba-ḳhud āvāz huī

phir kahīñ se ik zarā āvāz de
sar pe aa.ī maut bhī jaatī hai Tal

havā se ulajhtā huā maiñ uḌā jā rahā huuñ añdherā hai gahrā ghanā be-amāñ
maiñ bulātā huuñ āvāz detā huuñ ab us hasīñ shahr ko

sab kī āvāz meñ āvāz milā rakkhī hai
apnī pahchān magar sab se judā rakkhī hai

mutrib-e-ḳhush-āvāz huī hai zaḳhm-āvar āhañg-e-balā
vo jo mire hisse kī lai thī tere gale meñ Dhaltī hai

darvāzoñ pe de rahā huuñ āvāz
ḳhāmosh hai guñg hai siyah-posh

lauTā huuñ to mahfileñ haiñ ḳhāmosh
aatī nahīñ qahqahoñ kī āvāz

mujh tak pahuñch gayā to baḌī baat jāniye
āvāz-e-pā se jis kī mirā ziina jī uThā

kaan meñ pichhle pahar aa.ī ik āvāz-e-hazīñ
ab to ġham-ḳhvār bhī diq haiñ tire bīmāroñ se

ye batā de mujh ko mere dil kise āvāz duuñ
ḳhud masīhā hai mirā qātil kise āvāz duuñ

kaun hai mushkil-kushā merā qabā tere sivā
jab paḌe mujh par koī mushkil kise āvāz duuñ

vo chalātā hai ajab andāz se tīr-e-nazar
aur meñ ho jaatā huuñ bismil kise āvāz duuñ

haal merā ḳhanjar-e-māzī se zaḳhmī ho gayā
ro rahā hai merā mustaqbil kise āvāz duuñ

le gayā vo saath apne gulshan-e-dil kī bahār
suunī suunī hai mirī mahfil kise āvāz duuñ

jitne saaqī the mire sab nazr-e-tūfāñ ho ga.e
aur kosoñ duur hai sāhil kise āvāz duuñ

jaañ nichhāvar kar rahā thā mujh pe jo 'afzal' kabhī
dushmanoñ meñ vo bhī hai shāmil kise āvāz duuñ