Tags-Awaz

āvāz bhī detī hai ki uTh jaag mere la.al
Dartī bhī hai bachcha kahīñ bedār na ho jaa.e

mujhe ronā nahīñ āvāz bhī bhārī nahīñ karnī
mohabbat kī kahānī meñ adākārī nahīñ karnī

kaun ho saktā hai aane vaalā
ek āvāz sī aa.ī thī abhī

kholā darvāza samajh kar mujh ko ġhair
khā ga.e dhokā mirī āvāz se

gum rahā huuñ tire ḳhayāloñ meñ
tujh ko āvāz umr bhar dī hai

chaTaḳh ke TuuT ga.ī hai to ban ga.ī āvāz
jo mere siine meñ ik roz ḳhāmushī huī thī

be-nishāñ ho rahūñ jab tak tirī āvāz ke saath
phir kisī lafz sā imkān meñ aa jaatā huuñ

is bahr-e-be-sadā meñ kuchh aur nīche jaa.eñ
āvāz kā ḳhazīna shāyad tahoñ meñ paa.eñ

koī āvāz-e-pā na bāñg-e-jaras
kārvāñ aur is qadar ḳhāmosh

tujh ko āvāz duuñ aur duur talak tū na mile
aise sannāToñ se aksar mujhe Dar lagtā hai

ham ne chup rah ke jo ek saath bitāyā huā hai
vo zamānā mirī āvāz meñ aayā huā hai

na jaane kaun hai jo ḳhvāb meñ āvāz detā hai
ḳhud apne-āp ko nīñdoñ meñ chalte maiñ ne dekhā hai

ek āvāz maiñ ne sunī thī abhī kaun bolā thā ye to ḳhabar hī nahīñ
ye ta.alluq zarūrī hai kis ne kahā vo bhī ḳhāmosh thā maiñ bhī ḳhāmosh thī

jaise vīrāne se Takrā ke palaTtī hai sadā
dil ke har goshe se aa.ī tirī āvāz mujhe

āfāq-e-bulandī se āvāz ye aatī hai
ik asr meñ shāmil ho ik pal se alāhada ho

suno to phir havā kā tez jhoñkā
kise āvāz detā jā rahā hai

lams-e-harf-o-saut kī lazzat se vāqif thī magar
pahlū-e-āvāz meñ taḳh.īl sharmātī rahī

mere dukhoñ kī guuñj
tumhārī āvāz se surīlī hai

havā-e-dasht abhī to junūñ kā mausam thā
kahāñ the ham tirī āvāz-e-pā nahīñ aa.ī

maiñ nā-shunīda sadā-e-sahrā banūñgā āvāz-e-vaqt 'kaifī'
zabān-e-ālam pe ā.ūñgā kal maiñ aaj ik harf-e-nārsā huuñ