Tags-Awaz

tamām aalam se moḌ kar muñh maiñ apne andar samā gayā huuñ
mujhe na āvāz de zamāne maiñ apnī āvāz sun rahā huuñ

din bhar kī mashaqqat se thak haar ke ghar jaa.eñ
aur apnī hī dastak kī āvāz se Dar jaa.eñ

āvāz meñ ye ras ye latāfat ye iztirār
jaise subuk mahīn ravāñ reshmī phuvār

miTTī kī āvāz sunī jab miTTī ne
sāñsoñ kī sab khīñchā-tānī ḳhatm huī

patthar bhī chaTaḳhte haiñ to de jaate haiñ āvāz
dil TuuT rahe haiñ to sadā kyuuñ nahīñ dete

kis ne sochā thā ki ḳhud se mil kar
apnī āvāz se Dar jaanā hai

shahr ko chhoḌ ke vīrānoñ meñ ābād to ho
tujhe tanhā.ī kī āvāz sunā.ī degī

phailī haiñ fazāoñ meñ is tarah tirī yādeñ
jis samt nazar uTThī āvāz tirī aa.ī

salīb-e-vaqt par maiñ ne pukārā thā mohabbat ko
mirī āvāz jis ne bhī sunī hogī hañsā hogā

jab uThāyā paañv 'ātish' misl-e-āvāz-e-jaras
kosoñ pīchhe chhoḌ kar maiñ qāfila jaatā rahā

ḳhāmoshī kī kaThinā.ī meñ chup kī biptā meñ
us āvāz kā shahd ghule to mil jaa.e nirvān

tujh ko sab dete haiñ āvāz vo apne hoñ ki ġhair
is taraf maiñ ne mo.azzin ne udhar yaad kiyā

aa rahā thā maiñ ka.ī kūchoñ se Thokar khā kar
ek āvāz ne rokā mujh ko

alfāz se khīñchī ga.ī tasvīr-e-do-ālam
āvāz meñ rakkhe ga.e āsār hamāre

gir ke TuuTā nahīñ shāyad vo kisī patthar par
us kī āvāz meñ tābinda khanak hai kitnī

din ke sahrā meñ jise DhūñD na paa.eñ 'fikrī'
shab ke jañgal meñ vo āvāz sunā karte haiñ

tirī āvāz maddham aur maddham hotī jaatī hai

jaras kī naġhmagī āvāz-e-mātam hotī jaatī hai

naqsh kī sūrat likhī āvāz ko de do rihā.ī
be-takallum lafz bhī ab to ibārat chāhte haiñ

jā.egā jahāñ tū mirī āvāz sunegā
maiñ chor kī mānind tire dil meñ chhupā huuñ