Tags-Awaz

umr-bhar DhūñDte-phirte rahe apnī āvāz
terī āvāz meñ āvāz milāne vaale

dil meñ so.e hue naġhmoñ ko jagānā hai agar
merī āvāz meñ āvāz milāte chaliye

khāñstī maddham sī ik āvāz jab se kho ga.ī
ġhairiyat kī bū se mahkā mujh ko apnā ghar milā

kisī kā ma.ashūq chhūTtā hai sahar kā vaqt us ko lūTtā hai
koī ye siine ko kūTtā hai nahīñ hai āvāz ye gajar kī

maġhrib kī havāoñ se āvāz sī aatī hai
aur ham ko samundar ke us paar bulātī hai

guuñj sunñī ho to tanhā vādiyoñ meñ chīḳhiye
ek hī āvāz se ik silsila ban jā.egā

yā zamāne ko tū mahrūm-e-samā.at kar de
yā mujhe dard meñ Duubī huī āvāz na de

dā.ere TuuT na jaa.eñ mire ḳhvāboñ ke kahīñ
so gayā huuñ mujhe ab koī bhī āvāz na de

āvāz koī ho maiñ usī kī sadā sunūñ
har-samt mujh ko ek hī chehra dikhā.ī de

aañkh jhapkegī to shīrāza bikhar jā.egā
kis kī āvāz thī jis ne mujhe chauñkāyā hai

fariyād sadā-e-nafas āvāz-e-jaras hai
kyā qāfila-e-umr kuuñ chalne kā havas hai

bas ek shaam use āvāz dī thī hijr kī shaam
phir us ke ba.ad use umr bhar pukārā nahīñ

tirī ḳhāmoshiyoñ kī dhuup meñ bhī
tirī āvāz meñ bhīgā rahūñgā

hasīn bhī hoñ ḳhush-āvāz bhī farishta-e-qabr
kaTī hai umr hasīnoñ se guftugū karte

ham ne āvāz na dī barg o navā hote hue
aur milne na ga.e us kā patā hote hue

kyā zamāna hai ki is gumbad-e-be-dar meñ 'zafar'
apnī āvāz ko dekhā hai fanā hote hue

kal is zamīñ pe utreñge phūloñ ke qāfile
ik paikar-e-bahār kī āvāz-e-pā haiñ ham

kyuuñ na us parda-nashīñ ko ho takallum meñ hijāb
maiñ to āvāz ko bhī chehra-numā dekhtā huuñ

ham to ḳhud iz.hār haiñ apne zamāne kā 'matīn'
bujh ga.e āvāz ke sho.ale nayā lahja ugā

apnī hī āvāz ko be-shak kaan meñ rakhnā
lekin shahar kī ḳhāmoshī bhī dhyān meñ rakhnā