Tags-Teer

qazā kā tiir thā koī kamān se nikal gayā
vo ek harf jo mirī zabān se nikal gayā

chaḌhā na thā tiir bhī nazar kā
lachak na thī kuchh kamān meñ bhī

mujhe milā hai vahāñ apnā hī badan zaḳhmī
kahīñ jo tiir se ghāyal koī hiran dekhā

tīr-e-nigah vo hai ki jis tiir ke
sāmne hone ko jigar chāhiye

phir koī tishna-lab tiir is dasht meñ ham tak aayā hai tai kar ke kitnā safar
ai rag-e-jāñ kī jū-e-ravāñ ham bhī kuchh mehmāñ kī mudārāt karte raheñ

pyāsoñ kā hujūm rah gayā hai
ik tiir se mushk phaT ga.ī hai

qātil idhar jarrāh udhar maiñ nīm-bismil ḳhaak par
ik tīr-e-kash ik tīr-e-zan ek is taraf ek us taraf

tabsira ḳhuub yahāñ tiir kī raftār pe hai
tazkira kaun kare zaḳhm kī gahrā.ī kā

jab kaleje meñ tiir ho paivast
na karāhe to kyā kare koī

dil-e-be-rahm diyā zālim ko
jis tarah tiir ko paikāñ baḳhshā

mirī kamān meñ haiñ nā-tavāniyāñ merī
ḳhud apnī zaat pe haiñ tiir mere tevar ke

roz bātoñ ke tiir chhoḌtā huuñ
apne ajdād kī kamān se maiñ

ilaaj is dil-e-dard-āshnā kā kyā kiije
ki tiir ban ke jise harf-e-ġham-gusārī lage

hosh aatā hai to hotī hai kamāñ apnī taraf
aur phir tiir nikaltā huā rah jaatā hai

vaañ ta.ana tīr-e-yār yahāñ shikva zaḳhm-rez
bāham thī kis maze kī laḌā.ī tamām shab

paane kī nahīñ dil kā Thikānā ḳhalish-e-ġham
jab tak na patā pūchhe tire tiir se pahle

be-tāb hue yaar kī chuTkī se nikal kar
tiir aap taḌapne lage naḳhchīr se pahle

kyā laatī hai terī nigah-e-qahr kā muzhda
dauḌe hue aatī hai ajal tiir se pahle

chāñd barsātā hai jab rātoñ ko amrit kī phuvār
haañ usī kī har laḌī ik tiir hai tere baġhair

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ