Tags-Teer

zahe nasīb ki hañgām-e-mashq tīr-e-sitam
hamāre Dher ko tum to vo ḳhaak kā samjho

duur fazā meñ ek parinda khoyā huā uḌānoñ meñ
us ko kyā mālūm zamīñ par chaḌhe haiñ tiir kamānoñ meñ

tiir par tiir lagāo tumheñ Dar kis kā hai
siina kis kā hai mirī jaan jigar kis kā hai

Tiile se qahqahoñ kī phuvāroñ meñ the 'ġhanī'
tiir ek aañkh vaale achānak uchhal ga.e

qābil-e-ubūr itnī hai badan kī saf-bandī
tiir jitne chalte haiñ ruuh hī meñ gaḌte haiñ

ġhaflatoñ meñ 'asar' na hotā tū
tiir us kā ḳhatā nahīñ hotā

chhoTī hī sahī baat kī tāsīr to dekho
thoḌā sā magar zahr-bujhā tiir to dekho

tiir koī ho kamāñ koī ho
chāhte haiñ ki hadaf ho jā.ūñ

phir ke jo vo shoḳh nazar kar gayā
tiir sā kuchh dil se guzar kar gayā

said-afgano hamāre dil ko jigar ko dekho
ik tiir kā hadaf hai ik teġh kā sipar hai

kahāñ se aa.e the tiir ham par, tanābeñ ḳhemoñ kī kis ne kāTīñ
gurez kartī havā.eñ ham ko tamām bāteñ batā chukī haiñ

abhī khiñch hī jaatī lahū kī dhanak
miyāñ tiir Tuk terā tirchhā lagā

hameñ banāyā gayā hai hadaf ye jānte haiñ
to kyuuñ nishāne pe har tiir chāhte haiñ ham

mizhgāñ vo jhapaktā hai ab tiir hai aur maiñ huuñ
sar paañv se chhidne kī tasvīr hai aur maiñ huuñ

marhale aur aane vaale haiñ
tiir apnā abhī kamān meñ rakh

gumbad-e-gardūñ sambhal ai gumbad-e-gardūñ sambhal
kar na de sad paash tīr-e-āh par tāsīr dekh

ġhair ne mujh par sitam Dhaa.e haiñ Dhāle aaj tū
rah na jaa.e koī bhī tarkash meñ baaqī tiir dekh

us kī nazar se tiir jo niklā Thiik nishāne par baiThā
ghāyal aahū ban kar ham ne ban ban ko shādāb kiyā

kar chukī teġh-e-nigāh kaam to pal hī meñ tamām
tiir palkoñ kā muqābil mire pal pal na karo

ġhair par kyuuñ nigāh karte ho
mujh ko is tiir kā nishāna karo