Tags-Teer

ne tiir kamāñ meñ hai na sayyād kamīñ meñ
goshe meñ qafas ke mujhe ārām bahut hai

na dekh ai is is tarāsh-tīr ko
zarā ye dekh aa ki kis ke haath meñ kamān hai

dast-e-dushman se tiir kyā chhūTā
ek bijlī kamān se TuuTī

maiñ laraztā rahā hadaf ban kar
mashq-e-tīr-e-kamān chaltī rahī

dekhā ki hai bāzār yahāñ naf-o-zarar kā
vo tiir ki thā dil meñ tarāzū nikal aayā

vo zamīñ ke shahzāde tiir aur kamāñ le kar jañgaloñ meñ phirte the
ik hiran jo zaḳhmī thā dauḌtā huā aayā rādhikā kī bāhoñ meñ

zaḳhm bhī nahīñ lagte ḳhuun bhī nahīñ bahtā
tiir us kī mahfil meñ kis balā ke chalte haiñ

hazar tīr-e-mizhgāñ kī bochhāḌ se
ye ik dil kahāñ tak bachā.eñge ham

luuñ bosa ḳhūñ-bahā maiñ us abrū-kamān se
ab to jigar se tīr-e-nigah paar ho chukā

ye nād-e-alī kā ajab mo.ajiza thā
sabhī tiir palTe kamānoñ kī jānib

us kamāñ-abrū ke tīr-e-nāz kā
sīna-chākoñ kā jigar āmāj hai

nīl-gagan meñ tair rahā hai ujlā ujlā puurā chāñd
maañ kī lorī sā bachche ke duudh kaTore jaisā chāñd

ulTā safoñ ko teġh ne abrū-e-yār kī
tīr-e-mizha se darham-o-barham pare hue

na ḳhaTkeñ kaho kis tarah tīr-e-mizhgāñ
jigar par hamāre utāre hue haiñ

ehsān-e-tīr-e-yār adā ho sakegā kyā
jaan apnī nazr-e-lazzat-e-paikāñ hī kyuuñ na ho

to phir yaqīn kī sarhad meñ vaar kar mujh par
gumāñ kī dhund meñ jab tiir uchaTne vaalā hai

himmat kahāñ hai mujh meñ ki sach bol kar dikhā.ūñ
baiThe hue haiñ joḌe kamānoñ meñ tiir log

rahā dil meñ na hargiz tiir us kā
hameñ khaTkā yahī thā peshtar se

na kyuuñ tīr-e-nazar guzre jigar se
kahīñ ye vaar rukte haiñ sipar se

kyā ḳhabar apne Thikāne kī taraf lauT aa.e
ḳhud-ba-ḳhud tiir nishāne kī taraf lauT aa.e