Tags-Teer

tiir sā qad kamān kar apnā
khīñch fāqoñ ke biich chille shaiḳh

ik fasl ugī jūñhī zamīnoñ pe suroñ kī
tarkash se gire tiir fasīloñ se kamāneñ

tujhe havas ho jo mujh ko hadaf banāne kī
mujhe bhī tiir kī sūrat kamāñ meñ rakh denā

jā-e-dandāñ lab-e-sofār hue ai qātil
dahan-e-zaḳhm se hogā na tirā tiir judā

ai ḳhush-abrū koī phir Dhab pe chaḌhā taaza shikār
yuuñ jo har vaqt liye tīr-o-kamāñ rahte ho

us kī duzdīda-nigāhī ke haiñ sab hī ghāyal
koī sayyād liye tīr-o-kamāñ ho jaise

shab ko vo hathelī se un kā sharmā ke chhupānā āñkhoñ ko
barchhī kā adā kī chal jaanā us tīr-e-nazar kā rah jaanā

jumbish abrū ko hai lekin nahīñ āshiq pe nigāh
tum kamāñ kyuuñ liye phirte ho agar tiir nahīñ

kushtanī paas to aa jaa.e magar tere paas
neza-o-tīr hī hai dashna-o-shamshīr nahīñ

har ek lamha kisī tiir kā hai Dar lekin
maiñ mutma.in huuñ ki mere paroñ meñ jaan to hai

lagā jo piiTh meñ aa kar vo tiir thā kis kā
maiñ dushmanoñ kī safoñ meñ na marne vaalā thā

kaan lagā rahtā hai ġhair us shoḳh kamāñ abrū ke bahut
is to gunāh-e-azīm pe yaaro naak meñ us kī tiir karo

na jaane kaise tarāzū huā mire dil meñ
vo ek tiir jo terī kamāñ se bāhar hai

aap sharmā ga.e kyuuñ dekh ke raqs-e-bismil
kyā kahīñ tīr-e-nazar chal ke ḳhatā karte haiñ

kaun sā dil hai vo ki jis dil meñ
us ke tīr-e-nigah kā ghaav nahīñ

lage haiñ dil pe mire chārasāz tīr-e-balā
tumhī the sīna-sipar tum bachā sake na mujhe

koī pūchhe ki rah ke pahlū meñ
tiir kyā iztirāb ne maarā

naala jidhar merā guzar kar gayā
tiir sā har dil meñ asar kar gayā

kuchh der hī lagī na dil ko to tiir lagte
us said-e-nā-tavāñ kā kyā jī shitāb niklā

pahlū meñ bādshāh ke thā jalva-gar vazīr
sardār-e-dīñ alī-e-valī ḳhalq kā amiir