Tags-Teer

charḳh-e-bad-bīñ kī kabhī aañkh na phūTī sau baar
tiir naale ne mire chashm-e-zuhal meñ maarā

rañj ye hai ki mirā dard se mahkā huā tiir
us vafā-soz ne pahlū meñ khubūne na diyā

ham bhī haiñ 'bilqīs' majrūhīn meñ
ham pe bhī tiir o tabar chalte rahe

chhalnī chhalnī dil bhī jigar bhī rauzan rauzan siina bhī
ek nigāh-e-nāz ne terī tiir hazāroñ maare haiñ

gar khiñche siine se nāvak ruuh tū qālib se khīñch
ai ajal jab khiñch gayā vo tiir phir khīñchī to kyā

subūt apnī shujā.at kā tujh ko denā hai
shikasta tiir kaḌaktī huī kamān meñ rakh

dil se niklā pe na niklā dil se
hai tire tiir kā paikān aziiz

tiir barsā hī chāhte haiñ sambhal
apne hāthoñ meñ ek Dhaal ugā

maar ġhamza kī balā tīr-e-nigah dast-e-sināñ
teġh-e-abrū kī sitam tarkash-e-mizhgān parī

zaḳhmī shikār huuñ maiñ tirā mar hī jā.ūñgā
pahlū se mat judā tū mire tīr-e-vasl kar

har dil meñ chhupā hai tiir koī har paañv meñ hai zanjīr koī
pūchhe koī in se ġham ke maze jo pyaar kī bāteñ karte haiñ

ġhair par kyuuñ nigāh karte ho
mujh ko is tiir kā nishāna karo

tīr-e-bārāñ mere pindār pe haiñ ahl-e-jafā
izzat-e-nafs fanā ho to ġhazal kyā kahiye

maiñ tire hāthoñ ke qurbāñ vaah kyā maare haiñ tiir
sab dahān-e-zaḳhm muñh se marhabā kahne ko haiñ

us ghar meñ karam jab tū ne kiyā kuchh der Thahar ai tīr-e-nazar
bosa tire qadmoñ kā dil ne kis shauq se ai mehmān liyā

lahū meñ ghul ga.e jo gul dobāra khil bhī sakte haiñ
jo maiñ chāhūñ to siine par nishān-e-tīr ho paidā

nigāh pherne meñ lutf kyā hai rahne do
ye tiir kis liye ulTā mire jigar se phire

hañs kar na Taal jā ki ye ummīd kī kiran
vo tiir hai ki siine ke andar lagā mujhe

vo thā kaun sā terā tīr-e-sitam
ki maiñ aah us kā nishānā na thā

teġh kī tarah chalo chhoḌ ke āġhosh-e-niyām
tiir kī tarah se āġhosh-e-kamāñ tak aao