Tags-Tohfa

us ne to ik baar 'raḳhshāñ' mujh ko dekhā tak nahīñ
mez ke kone meñ rakkhā merā tohfa rah gayā

sub.h kā sonā jo haath aatā 'amīr'
bhejte tohfa mo.azzin ke liye

ye merī fikr ke gauhar tirī miTTī kā tohfa haiñ
tire qurbān jā.ūñ ilm-o-istidrāk ke ḳhitte

ek muddat se na dekhā thā uThā kar us kā ġham
us kā ġham bhī gard meñ lipTā huā tohfa lagā

tohfa mire ḳhulūs ne aisā diyā 'sabīn'
dhaḌkan meñ josh hai na harārat hai ḳhuun meñ

jhulastī dhuup meñ ThanDī havā kā jhoñkā bhej
chaman se jānib-e-sahrā bhī koī tohfa bhej

'prem' is yug kī sāl-girah par aur bhalā kyā tohfa dete
chāñd kī dilkash dhartī se bhī ham ne DhūñDh nikāle patthar

dard kī sūrat meñ vo umda sā tohfa de gayā
bevafā duniyā meñ jiine kā sahārā de gayā

nahīñ tohfa ḳhat-e-jānāñ ke barābar koī
hai mujhe qand-o-zaqan se kahīñ behtar kāġhaz

sitam kī bhiik sahī dostoñ kā tohfa hai
baḌī ḳhushī se ye ehsān ham uThāte haiñ

jibra.īl ab nahīñ ā.eñge zamīñ par hargiz
phir se āyāt kā tohfa nahīñ aane vaalā

ye zā.irān-e-alī-gaḌh kā ḳhaas tohfa hai
mirī ġhazal kā tabarruk diloñ kī barakat hai

maiñ is ko mohabbat kā tohfa kahūñ
agar tum ko mujh se shikāyat nahīñ

mere hisse kī udāsī mujhe lauTā denā
jā rahe ho to mujhe koī to tohfa denā

ahbāb-e-banaras ke liye 'mehr' kā tohfa
ek aur bhī saath us ke ġhazal jaa.e to achchhā

mire saath rahne vaalo mire ba.ad aane vaalo
mere daur kā ye tohfa tumheñ sāzgār aa.e

shahr-e-nigār-e-dil hai ātish-kade kī sūrat
mausam ne is baras bhī tohfa baḌā diyā hai

aaj bhī shāyad koī phūloñ kā tohfa bhej de
titliyāñ mañDlā rahī haiñ kāñch ke gul-dān par

mire nasīb ke qausain ne diyā tohfa
kabhī to lail-e-musalsal kabhī nahār ġhalat

yahīñ rakkhā thā ḳhvāboñ ke kināre
tirā anmol tohfa dikh rahā na.iiñ