Tags-Tohfa

tohfa meñ milī panting meñ
chāroñ mausam

ik ma.asūm se pyaar kā tohfa ghar ke āñgan meñ paayā thā
us ko ġham ke pāgal-pan meñ koThe koThe baañT diyā hai

jaltī dhuup meñ chāñd kā tohfa kyā kartī
shāyad maiñ dālān meñ rakh kar bhuul ga.ī

bajā.e gul mujhe tohfa diyā babūloñ kā
maiñ munharif to nahīñ thā tire usūloñ kā

maiñ tohfa le ke aayā huuñ tamannāoñ ke phūloñ kā
luTāne ko bahār-e-zindagānī le ke aayā huuñ

ik shar-e-musalmānī ik jazb-e-musalmānī
hai jazb-e-musalmānī sirr-e-falak-ul-aflāk

us haath kā tohfa thā ik daaġh mire dil par
vo daaġh bhī ab lekin jaatā nazar aatā hai

koī tohfa na koī ḳhat na kisī kī tasvīr
aur mire ghar se tire ġham ke sivā kyā niklā

ai 'muhib' kījiye dil us kī nazar
yahī tohfa yahī tahā.if hai

tohfa deñge tumheñ jo phūloñ kā
ham ko bhī intiḳhāb aatā hai

nayā saal aayā
koī bhī na tohfa hamāre liye hasb-e-ma.amūl laayā

aur kuchh tohfa na thā jo laate ham tere niyāz
ek do aañsū the āñkhoñ meñ so bhar laa.eñ haiñ ham

jo paas hai 'sāgar' ke sab kuchh hai tirā saaqī
jaañ bhī tirā tohfa hai dil bhī tirā nazrāna

sāvan-rut aur uḌtī purvā tere naam
dhūp-nagar se hai ye tohfa tere naam

us ne māñgā hai mujh se ik tohfa
ab to jaañ hī ye nazr karne de

pa.e-nazr-e-karam tohfa hai sharm-e-nā-rasā.ī kā
ba-ḳhūñ-ġhaltīda-e-sad-rañg da.avā pārsā.ī kā

us ne kāġhaz ko bhī phūloñ kī tarah chuum liyā
pesh ḳhushbū hī kareñ dūsrā tohfa na rahā

tābinda tāroñ kā tohfa sub.h kī ḳhidmat meñ pahuñchā
raat ne chāñd kī nazr kiye jo taare kam chamkīle the

jaañ se zyāda rakkhā jise ehtiyāt se
virse meñ jo milā thā vo tohfa bikhar gayā

zindagī tohfa milī jis ko nahīñ sarf kiyā
band Dabbe meñ na.ī chiiz paḌī TuuT ga.ī