Tags-Travel

jo raah meñ saath chhoḌ jaa.eñ
aisoñ ke to ham-safar nahīñ ham

bas itnā hosh hai mujh ko ki ajnabī haiñ sab
rukā huā huuñ safar meñ kisī dayār meñ huuñ

na chhoḌ saath mirā in akelī rāhoñ meñ
dil-e-ḳharāb tirā ham-safar maiñ tanhā huuñ

ġham o nashāt kī har rahguzar meñ tanhā huuñ
mujhe ḳhabar hai maiñ apne safar meñ tanhā huuñ

safar meñ hī chhupī un kī ḳhushī hai
musāfir ko masāfat bandagī hai

udāsī ke andhe safar meñ milā kyā
yahāñ shab nahīñ hai sahar bhī nahīñ hai

dasht meñ jo bhī hai jaisā mirā dekhā huā hai
rāsta us ke safar kā mirā dekhā huā hai

zarūr bujh ke rahegā ruḳh-e-safar-talabī
ye aabla hai to ik roz phuuT jā.egā

shahr meñ us ke naam ke jitne shaḳhs the sab hī achchhe the
sub.h-e-safar to dhund bahut thī dhūpeñ ban kar niklī meñ

safar bhī duur kā hai aur kahīñ nahīñ jaanā
ab ibtidā ise kahiye ki intihā kahiye

hayāt naam hai aise safar kā ai hamdam
qadam qadam pe jahāñ fikr-e-ās-o-yās chale

na.ī sadī ke safar meñ bhī ham akele haiñ
havā ke dosh pe ḳhushbū kā kārvāñ bhī nahīñ

ḳhatm hotā hī nahīñ merā safar
koī thak-hār gayā hai mujh meñ

ek terā ġham jis ko rāh-e-mo'tabar jāneñ
is safar meñ ham kis ko apnā ham-safar jāneñ

maiñ apne-āp se aage nikal gayā huuñ bahut
kisī safar ke havāle ye jism-o-jāñ kar ke

jo kaT rahī hai tirī chashm-e-be-nihāyat meñ
rah-e-hayāt hai sārī, rah-e-safar koī hai

aaj hī darpesh thā ham ko safar raat kā
aaj hī aflāk par koī sitāra nahīñ

kis tarah samjhūñ mirā ishq hai sargarm-e-safar
raah bedār huī hai na kahīñ sham.a jalī

duniyā sañvar ga.ī hai nizām-e-digar ke ba.ad
manzil pe aa ga.ī hai mashiyyat safar ke ba.ad

manzil pe chhiḌ ga.ī hai kudūrat kī dāstāñ
har kārvāñ ne gard uḌaa.ī safar ke ba.ad