Tags-Travel

luTte luTte bhī dil-e-mahzūñ ko
dard kā raḳht-e-safar yaad aayā

bichhaḌ gayā hai kahāñ kaun kuchh pata hī nahīñ
safar meñ jaise koī apne saath thā hī nahīñ

kisī ke dosh na markab se istifāda kiyā
yahāñ talak kā safar ham ne pā-pyāda kiyā

pata chalā ki har ik gaam meñ thī ik manzil
khule haiñ manzil-e-maqsūd par safar ke fareb

kabhī maiñ karbalā gayā kabhī madīna o najaf
kahāñ kahāñ safar kiyā ki rābta banā rahe

thakan kī dhuup Dhalī bhī nahīñ thī sar se abhī
azāb-e-hukm-e-safar mujh pe phir utar aayā

nikal paatā nahīñ maiñ kūcha-e-be-nām se 'azmī'
ki asbāb-e-safar meñ kuchh kamī maujūd rahtī hai

ravāñ rakhte haiñ ham ko dasht-e-dariyā dhuup darvāze
sarāboñ se safar meñ tishnagī maujūd rahtī hai

safar qadmoñ se vābasta hai lekin rāsta apnā
gulistānoñ se vābasta na vīrānoñ se vābasta

hai vahī mārka-e-nekī-o-shar mere ba.ad
tham na jaa.eñ kahīñ yārān-e-safar mere ba.ad

ye tamavvuj ye talātum ye shahādat ye shuhūd
ḳhatm hai manzil-e-avval kā safar mere ba.ad

chand saa.at ke liye ruk bhī gayā ro bhī liyā
kārvāñ phir bhī hai sargarm-e-safar mere ba.ad

zindagī kyā hai tilismāt kī vaadī kā safar
phir bhī fursat nahīñ miltī mujhe hairānī kī

lauT jaane ko bahut dil machlā
kyā pas-e-gard-e-safar yaad aayā

phir mire paañv meñ zanjīr paḌī
phir tirā hukm-e-safar yaad aayā

milnā safar kā aur bichhaḌnā safar kā hai
duniyā to rahguzār hai mahfil na kah ise

ranj-e-girān-e-shauq kā hāsil na kah ise
tark-e-safar kiyā hai tū manzil na kah ise

chune haiñ vo reza reza manzar, lahū lahū ho ga.ī haiñ āñkheñ
chalo naa! us dukh ke rāste par safar kī tafsīl chal ke dekheñ

yuuñ kis tarah kaTegā kaḌī dhuup kā safar
sar par ḳhayāl-e-yār kī chādar hī le chaleñ

kuuch hī kuuch hai har rañg meñ duniyā kī hayāt
ik safar ḳhatm huā ek safar baaqī hai