Tags-Travel

apnī hī zaat ke haale meñ rahe ham 'āzād'
an-ginat dā.eroñ kā ya.anī safar likkhā thā

sarhad-e-jism se bāhar kahīñ ghar likkhā thā
ruuh par apnī ḳhalāoñ kā safar likkhā thā

bhalā vo log kyā jāneñ safar kī lazzatoñ ko
jinheñ manzil milī ho Thokareñ khāne se pahle

jab safar 'afsar' kabhī karte nahīñ
dekhe phir kyuuñ ho tum manzil ke ḳhvāb

apnī ḳhvāhish meñ jo bas ga.e haiñ vo dīvār-o-dar chhoḌ deñ
dhuup āñkhoñ meñ chubhne lagī hai to kyā ham safar chhoḌ deñ

ye aa.e din ke hañgāme
ye jab dekho safar karnā

maiñ zindagī ke safar meñ thā mashġhala us kā
vo DhūñD DhūñD ke mujh ko gañvā diyā kartā

thak thak ke tirī raah meñ yuuñ baiTh gayā huuñ
goyā ki bas ab mujh se safar ho nahīñ saktā

karūñ to kaise karūñ maiñ tirī galī meñ qayām
mire to jo bhī sitāre haiñ vo safar hī ke haiñ

na aarzū na koī hausla na manzil hai
tumhī ho zauq-e-safar thoḌī duur saath chalo

phir lauTā hai ḳhurshīd-e-jahāñ-tāb safar se
phir nūr-e-sahar dast-o-garebāñ hai sahar se

kyā vo koī jhoñkā thā nasīm-e-saharī kā
yā rahguzar-e-ḳhvāb pe ḳhushbū kā safar thā

tai ham ne kiyā saarā safar yak-o-tanhā
juz gard-e-safar koī na hamrāh-e-safar thā

har roz nayā hashr sar-e-rāhguzar thā
ab tak kā safar ek qayāmat kā safar thā

ḳhvāb meñ bhī merī zanjīr-e-safar kā jāgnā
aañkh kyā lagnā ki ik saudā-e-sar kā jāgnā

ham jis ke saath shauq se nikle the sair ko
vo ham-safar kahāñ hai vo jañgal kahāñ gayā

chāñd kā qurb lagā kaisā chalo pūchh aa.eñ
āsmānoñ ke safar se vo palaT aayā hai

chalte rahe to kaun sā apnā kamāl thā
ye vo safar thā jis meñ Thaharnā muhāl thā

hausle dhuup ne kiye paspā
jism lambe safar se TuuT ga.e

bhaTak rahā huuñ abhī zindagī ke sahrā meñ
ḳhabar nahīñ ki kahāñ ḳhatm ho safar merā