Tags-Travel

raat bhar sūraj ke ban kar ham-safar vāpas hue
shaam bichhḌe ham to hañgām-e-sahar vāpas hue

āḳhirī manzil-e-taskīn-e-dil-o-jān talak
manzileñ raah na kāTeñ ye safar chāhtā thā

ye hausla jo abhī bāl-o-par meñ rakkhā hai
tumhārī yaad kā jugnū safar meñ rakkhā hai

muddatoñ tak safar meñ rah kar bhī
koī manzil se duur hai mujh meñ

nikle bahār oḌh ke kuchh ḳhushnumā badan
ḳhushbū bhī ham-safar hai qabāoñ ke saath saath

tavīl the jo vahī fāsle simaT se ga.e
mirā sharīk-e-safar jab tirā ḳhayāl huā

sisaktī sham.oñ kā ye āḳhirī Thikānā hai
shurūa hogā yahīñ se safar añdhere kā

dimāġh-o-dil pe ho kyā asar añdhere kā
ki dīda-var bhī hai ab ham-safar añdhere kā

tire safar kī ḳhabar sun ke jaan dhaḌkoñ se
jo pahuñchūñ marg ke nazdīk maiñ to duur nahīñ

lamha lamha roz o shab ko der hotī jā.egī
ye safar aisā hai sab ko der hotī jā.egī

safar mudām safar hī to hai safar kā sila
tū apnā qissa-e-lā-samtiyat uḌaan pe likh

safar alāmat-e-hastī safar dalīl-e-hayāt
ḳhushā vo log safar jin kā nā-tamām rahā

yārān-e-safar haiñ tez-qadam ai kashmakash-e-dil kyā hogā
ruktā huuñ to bichhḌā jaatā huuñ chaltā huuñ to chalnā mushkil hai

ravāñ rahe safar-e-marg par yūñhī varna
hamārī raah meñ ye zindagī bahut aa.ī

ḳhalā ke jaisā koī darmiyān bhī paḌtā
phir is safar meñ kahīñ āsmān bhī paḌtā

ġhazva-e-ḳhandaq kā safar
zabān kī ḳhandaq tak aa pahuñchā

mash.hūr hai ki ishq kī rāheñ haiñ ḳhaufnāk
himmat se pahle pūchh safar kar sake to kar

jāda-e-ishq tirā haq to adā kis se huā
ḳhair itnā hai ki āġhāz-e-safar ho ga.e ham

gard ko bhī na pahuñch sakte the rahzan jin kī
unhīñ manzil se bhī aage ke safar le Duube

dasht meñ jis tarah shajar tanhā
kaT gayā us tarah safar tanhā