Tags-Travel

ham thake-hāre haiñ ai azm-e-safar ham ko sambhāl
kahīñ saaya jo nazar aayā hai ghabrā.e haiñ

safar nasīb jo sahrāoñ ke musāfir haiñ
vo log shahr meñ kis tarah ab qayām kareñ

darpesh hai guzishta rutoñ kā safar hameñ
hairat na kar ki lauT ke vāpas na aa.eñ ham

rāste ke pech-o-ḳham kyā shai haiñ sochā hī nahīñ
ham safar par jab se nikle muḌ ke dekhā hī nahīñ

kyā jāneñ safar ḳhair se guzre ki na guzre
tum ghar kā pata bhī mire sāmān meñ rakhnā

ye bhī haiñ us falak-e-husn ke juuyā mirī tarh
chāñd sūraj ko jo din-rāt safar rahtā hai

rāste meñ kahīñ niiñd aa ga.ī hogī shāyad
is safar meñ to mirā dīda-e-bedār gayā

qarār maut hai manzil-pazīr qadmoñ kī
musāfiroñ ko phir āmāda-e-safar karnā

ḳhushbuoñ se tirī ye mahaktā safar yuuñ hī jaarī rahegā mire auj par
tū masāfat mirī maiñ tirā rāstā maiñ samundar huuñ tū sāhiloñ kī havā

na ham-safar na kisī ham-nashīñ se niklegā
hamāre paañv kā kāñTā hamīñ se niklegā

safar karo to ik aalam dikhā.ī detā hai
qad apnā pahle se kuchh kam dikhā.ī detā hai

har ek gaam pe ranj-e-safar uThāte hue
maiñ aa paḌā huuñ yahāñ tujh se duur jaate hue

be-ḳhabar be-samt hī apnā rahā hai ye safar
jā rahe haiñ ham kidhar ḳhud ko bhī batlāyā nahīñ

dimāġh arsh pe hai ḳhud zamīñ pe chalte haiñ
safar gumān kā hai aur yaqīñ pe chalte haiñ

dil ko duniyā kā hai safar darpesh
aur chāroñ taraf hai ghar darpesh

isī ummīd par kaaTā safar tārīk rāhoñ kā
na jaane kaun se gumbad se vo mah-rū nikal aa.e

ab takānoñ kā safar hai maiñ huuñ
aañkh se niiñd uḌā dī kis ne

sila ye manzil-e-maqsūd kā milā 'shādāb'
safar tamām huā aur ham-safar bhī gayā

shauq-e-safar be-sabab aur safar be-talab
us kī taraf chal diye jis ne pukārā na thā

hādsāt ab ke safar meñ na.e Dhab se aa.e
kashtiyāñ bhī nahīñ Duubī na kināre aa.e