Tags-Travel

ḳhayāl-o-ḳhvāb se niklūñ zuhūr tak dekhūñ
safar ke dā.ere toḌūñ ubuur tak dekhūñ

har ek gaam pe ranj-e-safar uThāte hue
maiñ aa paḌā huuñ yahāñ tujh se duur jaate hue

tamannā āsmānoñ ke safar kī
magar āñgan ki bas chhoḌā na jaa.e

vo kare azm-e-safar to kījiye duniyā se kuuch
ye irāda ham ne bhī dil meñ hai Thahrāyā huā

ajiib sāda-dilī hai mirī tabī.at meñ
chalā safar pe huuñ raḳht-e-safar khulā huā hai

us ko to safar karte nahīñ dekhā kisī ne
rāhoñ kī magar dhuul use pahchān rahī hai

yahāñ kahāñ bastiyoñ kī raunaq yahāñ to sannāTā chīḳhtā hai
ujaaḌ sahrā kā ye safar hai diloñ kī duniyā basā.e rahnā

aur āhista se guzar baabā
sāmne hai abhī safar baabā

haiñ yuuñ to ghar meñ bhī ḳhadshāt zindagī ko magar
ajiib lagtā hai is daur meñ safar karnā

samundaroñ ke safar meñ vo pyaas kā aalam
ki farsh-e-āb pe ik karbalā kā manzar thā

manzil-e-dil milī kahāñ ḳhatm-e-safar ke baad bhī
rahguzar ek aur thī rāhguzar ke baad bhī

sukūt-e-shab hī sahī merā ham-safar lekin
mire sivā bhī koī jāgtā huā to hai

tez raftār safar se to gurezāñ hī rahe
ham kisī yaad meñ gum the ki ishārā TuuTā

vo ibtidā-e-safar meñ hī khul gayā mujh par
maiñ us ke saath zarā duur jā ke lauT aayā

barahna kāñToñ pe bistar bichhā diyā maiñ ne
tū bhuul jā ki mirī aarzū safar kī hai

kabhī jo ghar se na niklā ho us ko kyā ma.alūm
safar meñ kitne musāfir kahāñ kahāñ bhaTke

manzil vo ḳham-e-safar hai jis par
chorī sāmān ho gayā hai

safar kā azm to baaqī nahīñ rahā 'rāshid'
bas ab bañdhā huā asbāb dekh lete haiñ

jabki baaqī hai bahut us kī bulandī kā safar
zikr insāñ kā sar-e-arsh-e-barīñ hotā hai

raat biitī to gine aable aur phir sochā
kaun thā bā.is-e-āġhāz-e-safar shaam ke ba.ad