Tags-Travel

tum bhī afsos rāh-rau nikle
maiñ to samjhī thī ham-safar tum ko

ham-safar koī nahīñ hai mirī tanhā.ī kā
chand saa.e haiñ jo hamrāh mire chalte haiñ

merī ḳhātir der na karnā aur safar karte jaanā
lekin chhoḌ ke jaane vaalo ek nazar karte jaanā

bahut lambā safar tai ho chukā hai zehn o dil kā
tumhārā ġham alāmat ke sivā kyā rah gayā hai

zindagī yuuñ huī basar tanhā
qāfila saath aur safar tanhā

naaz bhalā kis baat kā tujh ko pās-e-hunar jab kuchh bhī nahīñ
manzil par pahuñchegā kaise raḳht-e-safar jab kuchh bhī nahīñ

ahbāb ko mubārak ye shauq tīrgī kā
hai zauq raushnī kā zād-e-safar hamārā

ye pahroñ pahroñ soch-nagar rātoñ rātoñ be-ḳhvāb lahar
phir kaise kaTegā dhūp-safar jab piir luTī jāgīr hue

hameñ safar kā ḳhasāra pasand thā varna
musāfirat kī thakan sar pe taan to rakhte

mohabbat kā safar he aur maiñ huuñ
vo manzūr-e-nazar hai aur maiñ huuñ

safar āsān kitnā ho gayā hai
vo merā ham-safar hai aur maiñ huuñ

pā.īñ har ek rāh-guzar par udāsiyāñ
niklī huī haiñ kab se safar par udāsiyāñ

manzil kī chāhatoñ meñ qadam raqs meñ rahe
be-kār umr-e-rā.egāñ kā ye safar gayā

sāñseñ shaboñ kī jaañ kī tanābeñ ukhaḌ ga.iiñ
agle safar pe ham ko ravāñ honā hai abhī

vo ham-safar jo chhoḌ ke aage chale ga.e
ai mauja-e-havā unheñ merā salām hai

chāñd tāroñ ne bhī jab raḳht-e-safar kholā hai
ham ne har sub.h ik ummīd pe dar kholā hai

ehsās par garāñ rahā ehsās kā tilism
ye umr kī takān safar tak nahīñ rahī

āvāz de ke dekh lo shāyad vo mil hī jaa.e
varna ye umr bhar kā safar rā.egāñ to hai

rah-e-hayāt meñ lākhoñ the ham-safar 'ejāz'
kisī ko yaad rakhā aur kisī ko bhuul ga.e

uThā na pā.egī āsūdgī thakan kā bojh
safar kī gard hī āsāb kī ḳhabar rakkhe