Tags-Travel

badal denā hai rasta yā kahīñ par baiTh jaanā hai
ki thaktā jā rahā hai ham-safar āhista āhista

khulegī us nazar pe chashm-e-tar āhista āhista
kiyā jaatā hai paanī meñ safar āhista āhista

aañkh se le ke dil talak kā safar
inkishāfāt se hai vābasta

safar āzād hone ke liye hai
mujhe manzil kā kuchh dhokā nahīñ hai

mujh ko ye mohtāt iḳhlās-e-nazar achchhā lagā
us kī duzdīda nigāhoñ kā safar achchhā lagā

ek manzil hai jo imkān se bāhar hai kahīñ
ik masāfat hai ki bas gard-e-safar khīñchtī hai

ajnabī ham aaj se haiñ par safar to hai vahī
sirf kah dene se hotā hai kahīñ rasta alag

ek hī pal meñ simaT jaa.e safar sadiyoñ kā
yuuñ nigāhoñ meñ qayāmat kā vo manzar khīñche

safar mujh par ajab barpā rahī hai
mirī vahshat mujhe chauñkā rahī hai

kār-e-bekār huī bus meñ safar kartā huuñ
ye bhī ik sūrat-e-be-kaif hai mahñgā.ī kī

ye mohr o nishāñ tabl-o-alam ḳhuub hai lekin
baḌh jā.egā kuchh bār-e-safar aur hamārā

safar tamām huā jab sarāb kā to khulā
ajiib zā.iqa hotā hai ThanDe paanī kā

ab raftagāñ kī baat nahīñ kārvāñ kī hai
jis samt bhī ho gard-e-safar jaanā chāhiye

yuuñ to safar kiyā hai kitne hī rāstoñ par
lekin tire hī ghar kā rasta pasand aayā

ham to ajiib log the ham ko hazār rog the
ḳhuub kiyā jo aap ne ġhair ko ham-safar kiyā

jaise bhī tere ḳhvāb hoñ jo bhī tire sarāb hoñ
maiñ ne to ret oḌh lī maiñ ne to kam safar kiyā

anjām-e-intihā-e-safar dekhte chaleñ
ab gaañv aa ga.e haiñ to ghar dekhte chaleñ

aise ik tapte safar kī dāstāñ thī zindagī
dhuup thī saa.e meñ lekin dhuup meñ saaya na thā

safar adam kā kahāñ kare hai ye bahr-e-hastī se ek dam meñ
hubāb chashmak-zanī kare hai ḳhizar tirī umr-e-jāvedāñ par

vo ik badan ki jo sar-chashma-e-tasavvur ho
to pā-barahna safar meñ bhī zor ho jaa.e