Tags-Travel

dhuup meñ to safar saḳht dushvār hai be-shajar raah kā
sar kī ḳhātir koī soch saaya hī bun ham-safar baat sun

jo kar rahe the zamāne se gumrahī kā safar
unhīñ ke naam kiyā haq ne bandagī kā safar

ye ek kāhkashāñ hī nahīñ mirī manzil
ki us ke ba.ad bhī baaqī hai raushnī kā safar

usī kā saath ḳhudāyā mujhe mayassar ho
mohabbatoñ kā rifāqat kā zindagī kā safar

maiñ apnī zaat kā hissa jise samajhtā huuñ
mire ḳhudā kī hai baḳhshish vo āgahī kā safar

abhī hai vaqt sambhal jaao ai jahāñ vaalo
kahīñ tamām na ho jaa.e aadmī kā safar

jahāñ pe log añdhere sajā.e baiThe the
vahāñ pe aaj bhī jaarī hai raushnī kā safar

hai use duur kā safar dar-pesh
ham sambhāle nahīñ sambhalte haiñ

pahuñche haiñ jo apnī manzil par un ko to nahīñ kuchh nāz-e-safar
chalne kā jinheñ maqdūr nahīñ raftār kī bāteñ karte haiñ

ka.ī dinoñ ke safar se maiñ jab palaTtā huuñ
vo apne puure badan se kalām kartā hai

ye kyā vasvase ham-safar ho ga.e haiñ
sabhī rāste pur-ḳhatar ho ga.e haiñ

dasht-o-dariyā meñ kabhī gulshan-e-sahrā meñ kabhī
maiñ rahā mahv-e-safar ik tire paiġhām ke ba.ad

dil-e-betāb ke hamrāh safar meñ rahnā
ham ne dekhā hī nahīñ chain se ghar meñ rahnā

ġhubār-e-shab zarā is amr kī ḳhabar karnā
kahāñ se hai mujhe ab hijr kā safar karnā

ḳhud apne harf ke sho.ale meñ jal ke lauTā huuñ
maiñ ik safar pe gayā thā hikāyateñ le kar

hai ishq safar dil se faqat dil kā magar kyuuñ
is raah meñ aate haiñ bayābāñ bhī chaman bhī

kyuuñ zarūrī hai kisī ke pīchhe pīchhe ham chaleñ
jab safar apnā hai to apnī ravānī chāhiye

qayām-gāh na koī na koī ghar merā
azal se tā-ba-abad sirf ik safar merā

dekhte bādal se bārish tak safar taklīf kā
tum mirī āñkheñ agar rone se pahle dekhte

ba.ad kā saarā safar qaabū meñ rahtā aap ke
ḳhaak ko gar be-karāñ hone se pahle dekhte