Tags-Travel

āgāhī ma.akūs safar hai dānish-gāh ke raste kā
jis kā har jānā-pahchānā manzar hai an-jānā bhī

yahāñ pe ḳhuun bah gayā vahāñ pe laash gir paḌī
na jaane kaun shaḳhs thā safar tamām kar gayā

kho ga.ī manzil to ḳhair gard-e-safar meñ
jis pe maiñ chaltā rahā vo raah to hotī

ye zindagī hai sāyoñ kā bikhrā huā kafan
dasht-e-safar hai ḳhvāb kā phailā huā sarāb

ban ke lashkar saath ho jaatā hai vo 'fayyāz' jab
ham-safar koī na ho aur kārvāñ koī na ho

tayyār raho har-dam marne pe kamar bāñdhe
dar-pesh-e-ḳhudā jaane kab ye safar aa jaa.e

diid ke qābil hai to sahī 'majrūh' tirī mastānā-ravī
gard-e-havā hai raḳht-e-safar raste kā shajar ham-rāhī hai

anjām jo bhī ho mujhe is kī nahīñ hai fikr
āġhāz-e-dāstan-e-safar aap hī se ho

āñkheñ badan baġhair aur āñkhoñ meñ ek ḳhvāb
mahrūmī-e-ma.āl safar ke sabab se thā

shahar se shahar kā safar, ḳhvāb thā merā ham-safar
maiñ ne to jī lī zindagī, baiTh ke ek shaal meñ

mirī duā hai ba-har-gām chāhatoñ kā safar
tire liye ho sitāroñ kī kahkashāñ laḌkī

safar hai saḳht bahut saḳht agle moḌ ke ba.ad
chamak rahe the jo manzar ġhubār hone lage

havādis ham-safar apne talātum ham-ināñ apnā
zamāna luuT saktā hai to luuTe kārvāñ apnā

dhyān tayyārī kā aayā hī nahīñ ham ko 'aqīl'
safar-e-ishq thā be-raḳht-e-safar chal paḌe the

ḳhud se ḳhud tak kā safar sahl nahīñ thā itnā
rāste meñ ka.ī dariyā ka.ī jañgal paḌe the

safar meñ huuñ aur rukā khaḌā huuñ
maiñ chāroñ samtoñ meñ chal rahā huuñ magar kahāñ huuñ

har qadam par amiir is tarah Thaharnā sochnā kis liye
vaqt chhalnī hai aur is meñ paanī na pun ham-safar baat sun

kuchh batā dil ki dillī se kis lucknow kī taraf jā baseñ
kaun bastī hai jis par barastā hai hun ham-safar baat sun

rābta apnā zarḳhez miTTī se rakh aur sarsabz rah
khā gayā kitne sūkhe daraḳhtoñ ko ghun ham-safar baat sun

dhuup meñ to safar saḳht dushvār hai be-shajar raah kā
sar kī ḳhātir koī soch saaya hī bun ham-safar baat sun