Tags-Travel

jo nafas thā vo rahā garm-e-safar
kab musāfir ko Thaharnā aayā

hameñ ḳhabar hai hamāre safar kī ai 'manzūr'
kaheñge ham hī na hai rāstā sañvarne kā

manzil-shanās ban na sakā maiñ to kyā huā
itnā to jāntā huuñ ki rāh-e-safar meñ huuñ

umr bhar aa.egī hāthoñ se gulāboñ kī mahak
ḳhār-zāroñ kā safar barhana-pā kar Daalo

jaane kyā aas lagā.ī hai safar se maiñ ne
ek tinkā bhī uThāyā nahīñ ghar se maiñ ne

ḳhuun kī surḳhī safedī kī tarah mahv-e-safar
kuchh na.e rishtoñ ne har rishte ko gañdā kar diyā

haj kā safar hai is meñ koī saath bhī to ho
parda-nashīñ se apnī mulāqāt bhī to ho

ek safar hai vādī-e-jāñ meñ tere dard-e-hijr ke saath
terā dard-e-hijr jo baḌh kar lazzat-e-kaif-e-visāl huā

safar tavīl hai lekin yuuñ muḳhtasar kar luuñ
maiñ apnī dūrī-e-manzil ko ham-safar kar luuñ

bulandiyoñ ke safar kī mujh ko na daad dījiye
haiñ salb mere dimāġh-o-bāzū kī tāqateñ sab

maiñ ne sochā thā ki ye 'amabar' qismat merī badal deñge
mujh se bichhaḌ ke ye saare nikle raat safar sahrā aur maiñ

ham ne jis kī buniyādoñ meñ saañs kā siisa Daalā thā
miTTī ret aur gaare nikle raat safar sahrā aur maiñ

ġharq hue phir mauj-e-fanā meñ ik ik kar ke sab ke sab
dekho faanī saare nikle raat safar sahrā aur maiñ

dukh kī chādar taan ke ham ne hijr kī raat guzārī thī
aañsū jugnū taare nikle raat safar sahrā aur maiñ

dard aur ġham ke maare nikle raat safar sahrā aur maiñ
ek hī jañg ke haare nikle raat safar sahrā aur maiñ

manzil se hai ye kaisī aqīdat ki safar meñ
raahī koī raste pe bharosa nahīñ kartā

safar meñ aise ka.ī marhale bhī aate haiñ
har ek moḌ pe kuchh log chhūT jaate haiñ

ye añdherī raat aur be-samt sahrā kā safar
dushmanoñ se bach gayā to ḳhud bhī Thokar khā.ūñgā

ye to bas ik ravish-e-ḳhās pe kartī hai safar
aadmī gardish-e-aflāk se Dartā kyuuñ hai

sab se pīchhe rah gayā huuñ 'arsh' yuuñ is dasht meñ
maiñ safar meñ har kisī ko rāsta detā rahā