Tags-Travel

koī zauq-e-nazar hone lagā hai
bahut āsāñ safar hone lagā hai

huā thā hukm-e-safar dil magar thā rū-gardāñ
so rah meñ baiTh rahe dil pe dosh dharte hue

tamām umr safar meñ guzār duuñ apnī
tamām umr tamannā-e-rahguzar meñ rahūñ

kis tarah 'dā.em' kaTegā be-yaqīnī kā safar
mashvara ye ho rahā hai qāfiloñ ke darmiyāñ

dil dukhāyā na kisī shaḳhs kā dil toḌā hai
mere hamrāh yahī zād-e-safar jā.egā

nazar meñ rahnā thā 'nusrat' to us kī palkoñ se
tamām umr maiñ gard-e-safar haTātī rahī

ḳhatm kab hogā safar marne ke ba.ad
aur hogā tez-tar marne ke ba.ad

vo zamīn ho ki ho āsmāñ ye diyā hamesha jalā rahe
maiñ kisī safar meñ rahūñ magar mire saath maañ kī duā rahe

kanāra-gīr tamāshā.iyoñ se kaisā gila
har ek mauja-e-tūfāñ ke ham-safar hue ham

vo jis safar meñ murād-e-safar yaqīnī thī
usī safar pe na āmāda-e-safar hue ham

ham to sargarm-e-safar haiñ aur raheñge umr bhar
manzileñ apnī jagah āvārgī apnī jagah

ab bhī vo mere ham-safar haiñ ravish-e-ḳhayāl par
ab vo nasha hai hijr meñ thā jo kabhī visāl meñ

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

aa ki pahle ābloñ ke zaḳhm hī taaza kareñ
ai mire zauq-e-safar ab koī bhī sahrā nahīñ

ham-safar bhī thā magar izn-e-shanāsā.ī na thā
vo mire pahlū meñ thā aur maiñ ne pahchānā nahīñ

safar kī shart kabhī is qadar kaḌī kab thī
thakan kuchh aur baḌhī sāya-e-shajar pā kar

manzileñ muntazir-e-chashm-e-tamāshā hī raheñ
qāfile jā na sake gard-e-safar se aage

qarīb manzil-e-āḳhir hai al-firāq 'jigar'
safar tamām huā niiñd aa.ī jaatī hai

ḳhunuk fazāoñ meñ us dasht-e-ġham ke aane tak
hamāre saath koī aur bhī safar meñ thā

tum se ik ghūñT kī pyaas kyā bujh sakī jab ki vābastagī to samundar se thī
ham ne dariyāoñ tak kā safar tai kiyā apne be-ma.anī sī tishnagī ke liye